Ponnam Prabhakar : నిరుద్యోగులకు గుడ్‌న్యూస్.. ఆర్టీసీలో 3,038 ఉద్యోగాల భర్తీ.. త్వరలో నోటిఫికేషన్ : మంత్రి పొన్నం

Ponnam Prabhakar : తెలంగాణ ప్రభుత్వం నిరుద్యోగులకు మరోసారి గుడ్‌న్యూస్ చెప్పింది. ఎన్నికల్లో హామీ మేరకు ఉద్యోగాల నోటిఫికేషన్ జారీ చేస్తూ భర్తీ చేస్తుంది. ఇప్పటికే 56 వేల ఉద్యోగాలు వివిధ శాఖల్లో భర్తీ చేసింది. తాజాగా ఆర్టీసీలో ఉద్యోగాల భర్తీకి సిద్ధమైంది. త్వరలో ఆర్టీసీలో 3,038 ఉద్యోగాల భర్తీ చేయనున్నట్లు రావాణా శాఖ మంత్రి పొన్నం ప్రభాకర్‌గౌడ్ వెల్లడించారు. 3,038 ఉద్యోగాల భర్తీకి ప్రభుత్వం ఇప్పటికే అనుమతినిచ్చిందని తెలిపారు. త్వరలోనే నోటిఫికేషన్ వేస్తామని చెప్పారు. సాధ్యమైనంత త్వరలో ఉద్యోగాలు భర్తీ చేస్తామని ప్రకటించారు.

సీఎం రేవంత్‌రెడ్డి నాయకత్వంలో..
ముఖ్యమంత్రి రేవంత్‌రెడ్డి నాయకత్వంలో ఇప్పటికే ఆర్టీసీ బస్సుల్లో మహిళలకు ఉచిత ప్రయాణ సౌకర్యం కల్పిస్తున్నట్లు తెలిపారు. దీంతో ఆర్టీసీ బస్సుల్లో మహిళా ప్రయాణికుల సంఖ్య పెరిగిందని వెల్లడించారు. ఇప్పటి వరకు ఆర్టీసీ బస్సుల్లో 165 కోట్ల మంది మహిళలు ఉచితంగా ప్రయాణం చేశారని తెలిపారు. రూ.5500 కోట్లు ఆదా చేసినట్లు పేర్కొన్నారు. ఇప్పటికే మహాలక్ష్మి కోసం కొత్త బస్సులను కొనుగోలు చేశామని చెప్పారు. ఉద్యోగాల భర్తీకి ఆర్టీసీ సన్నద్ధమైందని పేర్కొన్నారు.

ఆర్టీసీలో మొత్తం ఉద్యోగాలు 3,038..

1. డ్రైవర్-2,000
2. శ్రామిక్-743
3. డిప్యూటీ సూపరింటెండెంట్ (ట్రాఫిక్)- 84
4. డిప్యూటీ సూపరింటెండెంట్ (మెకానికల్) – 114
5. డిపో మేనేజర్/అసిస్టెంట్ ట్రాఫిక్ మేనేజర్ – 25
6. అసిస్టెంట్ మెకానికల్ ఇంజినీర్ – 18
7. అసిస్టెంట్ ఇంజినీర్ (సివిల్) – 23
8. సెక్షన్ ఆఫీసర్ (సివిల్) -11
9. అకౌంట్ ఆఫీసర్స్ – 6
10. మెడికల్ ఆఫీసర్స్ జనరల్ – 7
11. మెడికల్ ఆఫీసర్స్ స్పెషలిస్ట్ – 7

పోస్టులను త్వరలో నోటిఫికేషన్ ద్వారా ప్రభుత్వం భర్తీ చేయనుంది. ఇప్పటికే కాంగ్రెస్ సర్కారు నిరుద్యోగులకు పెద్దపీట వేస్తూ దాదాపు 60 వేలకు పైగా ఉద్యోగాలను భర్తీ చేసిందని తెలిపారు. మరోసారి భారీస్థాయిలో ఉద్యోగాల నోటిఫికేషన్లు క్యాలండర్ ప్రకారం విడుదల చేయనుందని పేర్కొన్నారు. నిరుద్యోగులు సద్వినియోగం చేసుకొని మంచిగా ప్రిపేర్ కావాలని సూచించారు. ఆర్టీసీలో సుదీర్ఘ కాలం తర్వాత ఉద్యోగాల భర్తీ జరుగుతుండడంతో ముఖ్యమంత్రి రేవంత్‌రెడ్డికి, డిప్యూటీ సీఎం భట్టి విక్రమార్కకు మంత్రి పొన్నం ధన్యవాదాలు తెలిపారు.