Tamil Nadu: పళనిస్వామికి పెద్ద ఎదురుదెబ్బ.. ఎఐఎడిఎంకె ద్వంద్వ నాయకత్వానికి అనుకూలంగా మద్రాస్ హైకోర్టు తీర్పు

ఎఐఎడిఎంకె ప్రధాన కార్యదర్శి ఇ పళనిస్వామికి పెద్ద ఎదురుదెబ్బ తగిలింది. పార్టీలో ద్వంద్వ నాయకత్వాన్ని పునరుద్ధరిస్తూ ఆయన బద్ధ ప్రత్యర్థి పన్నీర్ సెల్వంకు అనుకూలంగా మద్రాసు హైకోర్టు తీర్పునిచ్చింది.

Tamil Nadu: ఎఐఎడిఎంకె ప్రధాన కార్యదర్శి ఇ పళనిస్వామికి పెద్ద ఎదురుదెబ్బ తగిలింది. పార్టీలో ద్వంద్వ నాయకత్వాన్ని పునరుద్ధరిస్తూ ఆయన బద్ధ ప్రత్యర్థి పన్నీర్ సెల్వంకు అనుకూలంగా మద్రాసు హైకోర్టు తీర్పునిచ్చింది. జూలై 11న జరిగిన ఏఐఏడీఎంకే జనరల్ కౌన్సిల్ సమావేశాన్ని ఏర్పాటు చేయడంలో చట్టబద్ధత మరియు చట్టాల ఉల్లంఘనను పన్నీర్ సెల్వంప్రశ్నించాడు. దీనిలో అతను బహిష్కరించబడ్డాడు. పళనిస్వామి తాత్కాలిక ప్రధాన కార్యదర్శిగా ఎన్నికయ్యాడు.

తాజాగా ఏఐఏడీఎంకే జనరల్ కౌన్సిల్ సమావేశాన్ని నిర్వహించాలని మద్రాస్ హైకోర్టుకు చెందిన జస్టిస్ జీ జయచంద్రన్‌తో కూడిన ధర్మాసనం ఆదేశించింది. జులై 29న, సీజేఐ ఎన్వీ రమణ నేతృత్వంలోని సుప్రీంకోర్టు ధర్మాసనం మూడు వారాల్లో ఈ అంశంపై మళ్లీ నిర్ణయం తీసుకోవాలని హైకోర్టును కోరింది. 2021 తమిళనాడు అసెంబ్లీ ఎన్నికల్లో డీఎంకే విజయం సాధించిన తర్వాత ఏఐఏడీఎంకేలో నాయకత్వ పోరాటం తెరపైకి వచ్చింది. జూన్ 23న జరగిన ఏఐఏడీఎంకే జనరల్ కౌన్సిల్ సమావేశానికి ముందు, పార్టీ జాయింట్ కోఆర్డినేటర్ మరియు అతని మద్దతుదారులు ఏకపక్షంగా జనరల్ సెక్రటరీ పదవిని పునరుద్ధరించడానికి ఎజెండాను ప్రవేశపెట్టాలని యోచిస్తున్నారని ఆందోళన వ్యక్తం చేస్తూ పన్నీర్ సెల్వం మద్రాస్ హైకోర్టును ఆశ్రయించారు. ముసాయిదా తీర్మానంలో పేర్కొన్న 23 అంశాలు మినహా మరే ఇతర అంశాలపైనా ఎలాంటి నిర్ణయం తీసుకోరాదని న్యాయమూర్తులు ఎం.దురైస్వామి, సుందర్‌మోహన్‌లతో కూడిన హైకోర్టు డివిజన్‌ బెంచ్‌ ఆదేశించింది. అయితే మద్రాసు హైకోర్టు ఇచ్చిన ఆదేశాన్ని సుప్రీంకోర్టు స్టే విధించింది. రాజకీయ పార్టీ అంతర్గత కార్యకలాపాల్లో జోక్యం చేసుకోలేమని, అన్నాడీఎంకే జనరల్ కౌన్సిల్ సమావేశంలో స్టే ఇచ్చేందుకు కూడా నిరాకరించింది. ఇంతలో, ఈ సమావేశం జరగకుండా ఆపడానికి పన్నీర్ సెల్వం చివరి ప్రయత్నంగా మరోసారి మద్రాస్ హైకోర్టును ఆశ్రయించారు. జస్టిస్ రామసామి తన వ్యాజ్యాన్ని కొట్టివేస్తూ, చట్టానికి అనుగుణంగా సమావేశాన్ని నిర్వహించవచ్చని అన్నారు.

జూలై 11న ఎఐఎడిఎంకె తాత్కాలిక ప్రధాన కార్యదర్శిగా ఇపిఎస్ ఎన్నికయ్యారు. తాజాగా ఈరోజు హైకోర్టు తీర్పు తర్వాత, ఓపీఎస్ ఏఐఏడీఎంకే కోఆర్డినేటర్‌గా, ఈపీఎస్ జాయింట్ కోఆర్డినేటర్‌గా తిరిగి నియమించబడ్డారు.