SRH-HCA : హెచ్‌సీఏ వివాదంపై సీఎం రేవంత్‌రెడ్డి సీరియస్.. విజిలెన్స్ విచారణకు ఆదేశం

SRH-HCA : హైదరాబాద్ క్రికెట్ అసోసియేషన్, సన్ రైజర్స్ హైదరాబాద్ యాజమాన్యం మధ్య నెలకొన్న వివాదంపై సీఎం రేవంత్‌రెడ్డి స్పందించారు. ఎస్‌ఆర్‌హెచ్ యాజమాన్యాన్ని వేధింపులకు గురిచేసిన హెచ్‌సీఏపై సీరియస్ అయ్యారు. ఈ అంశంపై ఇప్పటికే సీఎం వివరాలు సేకరించారు. దీనిపై విజిలెన్స్ విచారణకు సీఎం ఆదేశించారు. దర్యాప్తు తర్వాత కఠిన చర్యలు తీసుకోవాలని స్పష్టం చేశారు. ఇలాంటి చర్యలను ఉపేక్షించేది లేదని మండిపడ్డారు.

12 ఏళ్లుగా హెచ్‌సీఏతో కలిసి పనిచేస్తున్నామని సన్ రైజర్స్ జనరల్ మేనేజర్ శ్రీనాథ్ తెలిపారు. కానీ, గత రెండు సీజన్ల నుంచి తమకు చాలా వేధింపులు ఎదురవుతున్నాయని చెప్పారు. ఒప్పందం ప్రకారం ఉప్పల్ స్టేడియంలో మ్యాచ్ జరిగే సమయంలో హెచ్‌సీఏకు 10 శాతం (3900) కాంప్లిమెంటరీ టికెట్లు కేటాయిస్తున్నామని తెలిపారు. 50 సీట్ల సామర్థ్యం ఉన్న ఎఫ్12ఏ కార్పొరేట్ బాక్స్ టికెట్లు ఇస్తున్నామన్నారు. కానీ, ఈ ఏడాది దాని సామర్థ్యం 30 మాత్రమే అని పేర్కొంటూ, అదనంగా మరో బాక్స్‌లో 20 టికెట్లు కేటాయించాలని అడిగారని తెలిపారు. దీనిపై తర్వాత మాట్లాడుకుందామని చెప్పినా వినడం లేదని పేర్కొన్నారు. టికెట్లు ఇస్తేగానీ బాక్స్‌లు తెరవమంటూ బెదిరింపులకు గురిచేస్తున్నారని, వేధింపులు భరించడం తమ వల్ల కాదని, హైదరాబాద్ నుంచి వెళ్లిపోతామని ఇటీవల ఆయన లేఖ విడుదల చేశారు. తాజాగా దీనిపై సీఎం రేవంత్ స్పందిస్తూ విచారణకు ఆదేశించారు.

ఈ ఐపీఎల్‌ సీజన్‌లో భాగంగా ఇప్పటి వరకు హైదరాబాద్‌లో రెండు మ్యాచులు జరిగాయి. మొదటి మ్యాచ్‌లో సన్ రైజర్స్ జట్టు విజయం సాధించగా, రెండో మ్యాచ్‌లో ఓటమి పాలైంది. నాలుగైదు మ్యాచులు హైదరాబాద్ మైదానం వేదికగా జరగాల్సింది ఉంది. ఈ నేపథ్యంలో ఎస్ఆర్‌హెచ్, హెచ్‌సీఏ మధ్య వివాదం చోటుచేసుకోవడం హాట్ టాపిక్‌గా మారింది.