TG Inter Results : తెలంగాణలో రేపే ఇంటర్మీడియెట్ ఫలితాలు.. ఎన్ని గంటలకంటే?

TG Inter Results : తెలంగాణలో ఇంటర్ ఫలితాలు రేపు విడుదల కానున్నాయి. ఇప్పటికే ఇంటర్ బోర్డు అన్ని ఏర్పాట్లు పూర్తి చేసింది. ఈ నెల 22న మధ్యాహ్నం 12 గంటలకు నాంపల్లిలోని విద్యాభవన్‌లో తెలంగాణ డిప్యూటీ సీఎం భట్టి విక్రమార్క ఫలితాలను విడుదల చేయనున్నారు. ఈ సందర్భంగా తెలంగాణ ఇంటర్ బోర్డు కార్యదర్శి ఎస్‌. కృష్ణ ఆదిత్య ఫలితాల విడుదల తేదీ, సమయం ఖరారు చేశారు. విద్యార్థులు ఫలితాల కోసం ఇంటర్ బోర్డు అధికారిక వెబ్‌సైట్ నుంచి డౌన్‌లోడ్‌ చేసుకోవచ్చు. ఐవీఆర్‌ పోర్టల్‌ 9240205555 మొబైల్ నంబర్ ద్వారా ఫలితాలు తెలుసుకోవచ్చు.

తెలంగాణ వ్యాప్తంగా ఇంటర్ పరీక్షలు మార్చి 5వ తేదీ నుంచి 25వ తేదీ వరకు జరిగాయి. రాష్ట్రవ్యాప్తంగా 1532 పరీక్ష కేంద్రాల్లో 9.50లక్షల మంది విద్యార్థులు పరీక్షలకు హాజరయ్యారు. 4.88 లక్షల మంది ఫస్టియర్ విద్యార్థులు ఉండగా, సుమారు 5 లక్షలకు పైగా ద్వితీయ సంవత్సరం విద్యార్థులు ఉన్నారు.

విద్యార్థులు తమ హాల్‌ టికెట్ నెంబర్, పుట్టిన తేదీ వివరాలు ఎంటర్‌ చేసి ఫలితాలు తెలుసుకోవచ్చు. ఫలితాలు వెల్లడించిన తర్వాత రీకౌంటింగ్, రీవాల్యుయేషన్‌కు అవకాశం ఇవ్వనున్నారు. ఇందుకు సంబంధించిన తేదీలను అధికారులు మంగళవారం ఫలితాలు విడుదల తర్వాత వెల్లడించనున్నారు. పరీక్షల్లో ఫెయిల్‌ అయిన విద్యార్థులకు నెల రోజుల్లో సప్లిమెంటరీ పరీక్షలు నిర్వహించేందుకు ఇంటర్మీడియెట్ బోర్డు ఏర్పాట్లు సైతం చేస్తుంది. మరోవైపు ఇప్పటికే ఏపీలో ఇంటర్‌ ఫలితాలు వెల్లడించిన సంగతి తెలిసిందే.