Google Sundar Pichai: ఓపక్క లేఆఫ్స్.. మరోపక్క సంచలనంగా మారిన సుందర్ పిచాయ్ వేతనం..

ప్రపంచవ్యాప్తంగా ఐటీ రంగంలో లేఆఫ్స్ కత్తి వేలాడుతూనే ఉంది. కోవిడ్ 19 ప్రారంభమైన నాటి నుంచి టెక్ రంగంలో ఉద్యోగుల కోతలు కొనసాగుతున్నాయి.

Google Sundar Pichai: ప్రపంచవ్యాప్తంగా ఐటీ రంగంలో లేఆఫ్స్ కత్తి వేలాడుతూనే ఉంది. కోవిడ్ 19 ప్రారంభమైన నాటి నుంచి టెక్ రంగంలో ఉద్యోగుల కోతలు కొనసాగుతున్నాయి. ఈ కోతలు గత ఏడాది ఒక్కసారిగా పుంజుకున్నాయి. ఈ ఏడాది ప్రారంభం నుంచి ఉద్యోగుల ఉద్వాసనలు మరింత పెరిగాయి. ఇంటర్నేషనల్ కంపెనీలతో పాటు దేశంలోని పలు టెక్ కంపెనీలు ఇదే బాటలో వెళుతున్నాయి. టెక్ దిగ్గజం గూగుల్ కూడా ఖర్చులను తగ్గించుకునే క్రమంలో ఉద్యోగాల కోతలు విధించింది.

లేఆఫ్స్ నేపథ్యంలో..(Google Sundar Pichai)

ఈ క్రమంలో గూగుల్ మాతృ సంస్థ ఆల్ఫాబెట్ సీఈఓ సుందర్ పిచాయ్ వార్షిక ఆదాయం ఇప్పుడు చర్చనీయాంశమైంది. 2022 ఏడాదిగాను సుందర్ 226 మిలియన్ల డాలర్ల( అంటే భారత కరెన్సీలో రూ. 1850 కోట్లు) పారితోషికం అందుకున్నారనే వార్తలు ఇపుడు సంచలనంగా మారింది. ఈ మేరకు ఆల్భాబెట్ శుక్రవారం రెగ్యులేటరీకి వెల్లడించింది. సుందర్ పారితోషకంలో 218 మిలియన్ డాలర్ల విలువైన స్టాక్ అవార్డ్స్ ఉన్నాయి. ఈ పారితోషకం ప్రకారం గూగుల్ లో ఉద్యోగి జీతం కంటే దాదాపు 800 రెట్టు ఎక్కువ.

గత మూడేళ్లగా స్థిరంగా..

సుందర్‌ పిచాయ్‌ ఈ స్టాక్‌ అవార్డ్స్ ను 3 ఏళ్ల కాలానికి అందుకున్నారు. 2019 లో కూడా సుందర్ ఈ స్థాయిలోనే ప్యాకేజీ తీసుకున్నారు. 2019లో స్టాక్‌ అవార్డుల రూపంలో ఆయనకు 281 మిలియన్‌ డాలర్ల పారితోషికం అందుకునన్నారు. అదే విధంగా గత మూడేళ్లుగా పిచాయ్‌ స్థిరంగా 2 మిలియన్‌ డాలర్ల వార్షిక వేతనం తీసుకున్నట్టు కంపెనీ వెల్లడించింది.

కాగా, గూగుల్ ఈ ఏడాది జనవరిలో ఖర్చు నియంత్రణలో భాగంగా 12 వేల మంది ఉద్యోగులను తొలగిస్తున్నట్టు ప్రకటించింది. ప్రపంచవ్యాప్తంగా సంస్థలో ఉన్న మొత్తం ఉద్యోగుల్లో ఇది 6 శాతానికి సమానం. దీంతో ఈ నెల లో లండన్ లోని గూగుల్ ఉద్యోగులు నిరసన బాటపట్టారు. అంతకుముందు మార్చిలో కంపెనీకి చెందిన జ్యూరిచ్‌ ఆఫీసుల్లోనూ ఉద్యోగులు నిరసన వ్యక్తం చేశారు. ఈ క్రమంలో పిచాయ్ భారీ స్థాయిలో పారితోషకం అందుకోవడం ఇపుడు చర్చకు దారితీసింది.