Kamal Haasan: వివాదంలో కమల్ హాసన్.. కన్నడ వాసులకు క్లారిటీ

Thug Life: సీనియర్ నటుడు కమల్ హాసన్ నటించిన థగ్ లైప్ మూవీ కొద్ది రోజుల్లో ప్రేక్షకుల ముందుకు రాబోతోంది. మూవీ ప్రమోషన్ లో భాగంగా కమల్ హాసన్ బిజీబిజీగా ఉన్నారు. అయితే రెండు రోజుల క్రితం చెన్నైలో జరిగిన మూవీ ప్రమోషన్ లో భాగంగా కన్నడ భాషపై కమల్ హాసన్ చేసిన వ్యాఖ్యలు తీవ్ర దుమారం రేపాయి. శివరాజ్ ను ఉద్దేశిస్తూ.. కన్నడ భాష తమిళం నుంచే పుట్టిందని అనడంతో కర్నాటక వాసులు తీవ్ర ఆగ్రహం వ్యక్తం చేశారు. కమల్ హాసన్ క్షమాపణలు చెప్పాలని.. లేకపోతే థగ్ లైఫ్ సినిమాలో కర్నాటకలో విడుదల చేయనివ్వమని వార్నింగ్ ఇచ్చారు.  దీంతో ఈ వ్యవహారంపై కమల్ హాసన్ స్పందించారు. ఆ వ్యాఖ్యలు తాను కేవలం ప్రేమతో చేసినవేనని.. తనకు వేరే ఉద్దేశం లేదంటూ క్లారిటీ ఇచ్చారు.

” నేను ప్రేమతో అలా చెప్పాను. ఎంతోమంది చరిత్రకారులు భాషా చరిత్ర గురించి నాకు చెప్పగా, నేను అలానే అన్నాను తప్పా నా కామెంట్స్ లో మరో ఉద్దేశం లేదు. తమిళనాడు అరుదైన రాష్ట్రం. ఎంతో విశాల దృక్పథం కలిగింది. తమిళనాడులో కేవలం తమిళులే కాకుండా ఇతర భాషా నేపథ్యం ఉన్నవారు కూడా అత్యున్నత పదవులు నిర్వహించారు. చెన్నైలో ఇబ్బందులు ఎదుర్కొన్నప్పుడు కర్నాటక నాకు అండగా నిలిచింది. భాష అనేది చాలా సున్నితమైన అంశం. దాని గురించి మాట్లాడేందుకు రాజకీయ నాయకులు అర్హులు కాదు. నిజం చెప్పాలంటే, ఆ అర్హత నాకు కూడా లేదు అంటూ కమల్ హాసన్ చెప్పుకొచ్చారు. భాషా సంబంధిత విషయాల్లో రాజకీయ నాయకుల జోక్యం అనవసర పరిస్థితులకి దారి తీస్తుంది. తన వ్యాఖ్యల వల్ల ఎవరి మనోభావాలు అయిన దెబ్బ తిని ఉంటే క్షమాపణలు కోరుతున్నాను. రానున్న రోజుల్లో ఇలాంటి విషయాలలో చాలా జాగ్రత్తగా వ్యవహరిస్తాను అంటూ పరోక్షంగా సూచించారు. భాష అనేది ప్రజల మధ్య ఐక్యతను పెంపొందించే సాధనం కావాలి తప్ప, విభేదాలకు కారణం కాకూడదని కమల్ హాసన్ హితవు పలికారు. దీనిపై లోతైన చర్చను చరిత్రకారులకు, పురావస్తు శాస్త్రవేత్తలు, భాషా నిపుణులకు వదిలేద్దాం” అని కమల్ చెప్పుకొచ్చారు.