Gold Cards : ట్రంప్‌ గోల్డ్‌ కార్డుకు భారీ గిరాకీ.. ఒక్కరోజుల్లో ఎంతంటే?

Gold Cards : అగ్రరాజ్యం అమెరికా అధ్యక్షుడు ట్రంప్‌ ఇటీవల గోల్డ్ కార్డు ఆఫ‌ర్ ప్రక‌టించారు. ప్రస్తుతం ఉన్న పెట్టుబడి వీసా ఈబీ-5 స్థానంలో గోల్డ్‌ కార్డు తీసుకురానున్నట్లు ఆయన వెల్లడించారు. 5 మిలియన్‌ డాలర్లు ‌(సుమారు 44 కోట్లు) చెల్లించగలిగే వారికి నేరుగా అమెరికా పౌరసత్వాన్ని ఇవ్వనున్నారు. ట్రంప్‌ ప్రకటించిన గోల్డ్‌ కార్డుకు అమెరికాలో భారీ గిరాకీ ఉన్నట్లు తెలుస్తోంది.

ఒక్కరోజుల్లోనే 1,000 గోల్డ్‌ కార్డులు విక్రయం..
ఒక్కరోజుల్లోనే 1,000 గోల్డ్‌ కార్డులు విక్రయించినట్లు అమెరికా వాణిజ్యశాఖ మంత్రి హోవర్డ్‌ లుట్నిక్‌ తాజాగా వెల్లడించారు. వీటి ద్వారా 5 బిలియన్‌ డాలర్లు సేకరించినట్లు తెలిపారు. ప్రపంచ వ్యాప్తంగా 37 మిలియన్ల మందికి గోల్డ్‌ కార్డును కొనుగోలు చేయగల సామర్థ్యం ఉందన్నారు. ఒక మిలియన్‌ మంది వీటిని కొనుగోలు చేస్తారని అధ్యక్షుడు ట్రంప్‌ భావిస్తున్నారని చెప్పారు. గోల్డ్‌ కార్డు ప్రవేశపెట్టాలన్న ఆలోచన ఎవరిదన్న ప్రశ్నకు బదులిస్తూ.. అధ్యక్షుడు ట్రంప్‌దే అని బదులిచ్చారు. పెట్టుబడిదారు జాన్ పాల్సన్‌తో జరిగిన భేటీలో డొనాల్డ్ ట్రంప్ మదిలో నుంచి వచ్చిన ఆలోచన ఇది అన్నారు. అధ్యక్షుడి ఆలోచనను అమలు చేయడమే తన బాధ్యత అన్నారు. ఇందుకోసం తన వద్ద ప్రణాళిక ఉందని చెప్పుకొచ్చారు.

పౌర‌స‌త్వ కార్డుల ద్వారా వేగంగా జాతీయ ఆర్థిక సంక్షోభాన్ని కొంతవ‌ర‌కు త‌గ్గించ‌వ‌చ్చు అన్న అభిప్రాయంలో ట్రంప్ ఉన్నారు. ఈ క్రమంలో ఈబీ-5 ఇమ్మిగ్రెంట్ ఇన్వెస్టర్ వీసా ప్రోగ్రాం స్థానంలో గోల్డ్ కార్డు ఆఫ‌ర్లను ప్రకటించారు. ఈబీ-5 ప్రోగ్రాం ద్వారా అమెరికాలో పెట్టుబ‌డి పెట్టే విదేశీయుల‌కు గ్రీన్ కార్డు ఇస్తారు. గోల్డ్ కార్డుల‌ను అమ్మనున్నామ‌ని, 5 మిలియ‌న్ల డాల‌ర్లకే కార్డును ఇవ్వనున్నట్లు ట్రంప్ గత నెల ఫిబ్రవరిలో ప్రకటించారు.