Harish Rao : కేసీఆర్ తెలంగాణ జాతిపిత అయితే.. రేవంత్ బూతు పిత.. మాజీ మంత్రి హరీశ్‌రావు

Harish Rao : కాంగ్రెస్ ప్రభుత్వంపై మాజీ మంత్రి తన్నీరు హరీశ్‌రావు మరోసారి ఫైర్ అయ్యారు. ఇవాళ తెలంగాణ భవన్‌లో ఆయన మీడియాతో మాట్లాడారు. బయట బూతులు మాట్లాడుతున్న సీఎం రేవంత్‌రెడ్డి.. అసెంబ్లీలో నిజాలు మాట్లాడుతారు అనుకున్నామని, కానీ బూతులతోపాటు అబద్ధాలు మాట్లాడారని ఆరోపించారు.

కేసీఆర్ తెలంగాణ జాతిపిత అయితే రేవంత్ బూతు పిత అయ్యారని విమర్శించారు. బూతు సినిమాకు పనికొచ్చే స్క్రిప్ట్ లాగా ముఖ్యమంత్రి ఉపన్యాసం ఉందని, అబద్ధాలకు బ్రాండ్ అంబాసిడర్ రేవంత్ అని వ్యాఖ్యానించారు. అబద్ధాలకు కూడా జీఎస్టీ వేయాలని కోరారు. అబద్ధాలకు జీఎస్టీ వేస్తే తెలంగాణ ఆదాయం అంతా రేవంత్ అబద్ధాలకే సరిపోతుందని విమర్శించారు. మా నాయకుడు కేసీఆర్‌ను మార్చురీకి పంపాలని మాట్లాడుతావా అని ఆగ్రహం వ్యక్తం చేశారు. జానారెడ్డి ప్రతిపక్ష నేతగా ఉన్నప్పుడు.. పెద్దలు జానారెడ్డి అని గౌరవంగా మాట్లాడేవారని గుర్తుచేశారు. కేసీఆర్ చావు కోరుకుంటున్నావా అని ప్రశ్నించారు. పిచ్చి తుగ్లక్ చర్యల వల్ల తెలంగాణ పరువుపోతుందని మండిపడ్డారు.

స్ట్రేచర్ ఉన్న కేసీఆర్ స్ట్రచర్‌పై పోతాడని, తర్వాత మార్చురీకి పోతాడని సీఎం అన్నారని గుర్తుచేశారు. రేవంత్ ఇప్పుడు మాట మారుస్తున్నావని ఫైర్ అయ్యారు. ఎల్ఆర్ఎస్ విషయంలో మాట మార్చారని, ఫార్మా సిటీ భూముల విషయంలో రెండు మాటలు మాట్లాడుతున్నారని పేర్కొన్నారు. రుణమాఫీపై కూడా అబద్ధం ఆడారని, అసెంబ్లీలో రుణమాఫీపై అబద్దాలు మాట్లాడారని తెలిపారు. రుణమాఫీపై తాను సవాల్ విసురుతున్నానన్నారు. కొడంగల్, మధిర, సిద్దిపేట ఎక్కడైనా సరే పోదామని, రుణమాఫీ పూర్తిగా చేసినట్లు నిరూపిస్తే తాను ముక్కు నేలకు రాస్తానని చెప్పారు. బీజేపీ, రేవంత్ మైత్రి బయట పడింది. రాహుల్ గాంధీ ఏమో మోదీ చెడ్డోడు అంటే రేవంత్ ఏమో మంచోడు అంటున్నాడని హరీశ్‌రావు చెప్పారు.

ఇంకోసారి గెలుస్తామని రేవంత్ చిట్‌చాట్‌లో మాట్లాడారని, మీ సంగతి మొన్ననే తెలిసిందన్నారు. పట్టభద్రుల ఎమ్మెల్సీ ఎన్నికల్లో కాంగ్రెస్‌ను బండకేసి కొట్టారన్నారు. తెలంగాణలో ఎప్పుడు ఎన్నికలు జరిగినా రేవంత్‌రెడ్డి పులుసు తీయడానికి రాష్ట్ర ప్రజలు సిద్ధంగా ఉన్నారని విమర్శించారు. రేవంత్‌కే భార్య, బిడ్డలు ఉన్నారా..? ఇతరులకు భార్య, బిడ్డలు లేరా అని ప్రశ్నించారు. బాడీ షేమింగ్‌పై బూతులు మొదలు పెట్టింది నువ్వే కదా అని మండిపడ్డారు. కేటీఆర్ కుమారుడిని కూడా తిట్టావు కదా అన్నారు. నా ఎత్తు గురించి కామెంట్ చేశావ్ కదా అని మండిపడ్డారు. రేవంత్ ఇచ్చిన ఉద్యోగాలు 7 వేలు కూడా దాటలేదన్నారు. అందుకే ఎమ్మెల్సీ ఎన్నికల్లో బండకేసి కొట్టారన్నారు. 15 నెలలకే రేవంత్ తెలంగాణకు భారంగా మారారని, నీది వన్ టైం సెటిల్‌మెంట్, ఏ సెంటిమెంట్ నీకు సపోర్ట్ చేయదని, నీ పులుసు ప్రజలు తీస్తారని హరీశ్‌రావు తీవ్ర విమర్శలు చేశారు.