India vs South Africa 1st Test Day 2 - సౌతాఫ్రికా, భారత్ మధ్య రెండు మ్యాచ్‌ల టెస్ట్ సిరీస్ జరుగుతోంది. ఈ మేరకు కోల్‌కతా వేదికగా ఈడెన్ గార్డెన్స్ స్టేడియంలో తొలి టెస్ట్ ప్రారంభమైంది. ఈ మ్యాచ్‌లో భాగంగా సౌతాఫ్రికా టాస్ గెలిచి బ్యాటింగ్ ఎంచుకుంది. తొలుత బ్యాటింగ్ చేపట్టిన సౌతాఫ్రికా 159 పరుగులకు ఆలౌట్ అయింది. ఐడెన్ మార్క్‌క్రమ్ (31), టోనీ డి జార్జి (24), ర్యాన్ రికెల్టన్ (23) పరుగులు చేయగా.. మిగతా బ్యాటర్లు విఫలమయ్యారు. భారత బౌలర్లలో పేసర్ జస్‌ప్రీత్ బుమ్రా 5 వికెట్లు పడగొట్టగా.. కుల్దీప్ యాదవ్, మహ్మద్ సిరాజ్ తలో 2 వికెట్లు తీశారు. ఆ తర్వాత తొలి ఇన్నింగ్స్ ప్రారంభించిన భారత్.. 189 పరుగులకు ఆలౌట్ అయింది. దీంతో 30 పరుగుల లీడ్ సంపాదించింది. భారత బ్యాటర్లలో కేెెఎల్ రాహుల్(39), వాషింగ్టన్ సుందర్(29), రిషబ్ పంత్(27), రవీంద్ర జడేజా(27) పరుగులు చేయగా.. గిల్(4) పరుగుల వద్ద గాయం కావడంతో రిటైర్ట్ హర్ట్‌గా పెవిలియన్ చేరారు. సౌతాఫ్రికా బౌలర్లలో హార్మర్ 4 వికెట్లు, మార్కో 3 వికెట్లు, కేశవ్ మహారాజ్, కోర్మిన్ తలో వికెట్ తీశారు. ఇదిలా ఉండగా, భారత్, సౌతాఫ్రికా జట్లు 44 మ్యాచ్‌ల్లో తలపడ్డాయి. ఇందులో భారత్ 16 మ్యాచ్‌ల్లో గెలుపొందగా.. సౌతాఫ్రికా 18 మ్యాచ్‌ల్లో గెలిచింది. మిగతా 10 మ్యాచ్‌లు డ్రాగా ముగిశాయి. ఇందులో భారత్ 11 మ్యాచ్‌లలో స్వదేశంలో గెలవగా.. మిగతా 5 మ్యాచ్‌లలో సౌతాఫ్రికాలో గెలిచింది. ఇటీవల జరిగిన మ్యాచ్‌లలో భారత్ 7 వికెట్ల తేడాతో గెలుపొందింది.