Iran: డొనాల్డ్ ట్రంప్ కు ఇరాన్ వార్నింగ్

Iran Warns Trump: అమెరికా- ఇరాన్ మధ్య ప్రస్తుతం మాటల యుద్ధం కొనసాగుతోంది. రెండు రోజుల క్రితం వరకు మిస్సైళ్లతో దాడి చేసుకున్న ఇరుదేశాలు.. ఇప్పుడు పరస్పరం హెచ్చరికలు ఇచ్చుకుంటున్నాయి. ఈ నేపథ్యంలోనే అమెరికా అధ్యక్షుడు డొనాల్డ్ ట్రంప్ కు ఇరాన్ తాజాగా వార్నింగ్ ఇచ్చింది. ఇరాన్ సుప్రీం లీడర్ అయతుల్లా అలీ ఖమేనీ పట్ల గౌరవం, మర్యాదగా మాట్లాడాలని ఇరాన్ విదేశాంగ మంత్రి అబ్బాస్ అరఘ్చి వార్నింగ్ ఇచ్చారు.

కాగా ఇటీవల ట్రంప్ మాట్లాడుతూ.. ఖమేనీని చంపకుండా రక్షించామని, కానీ ఆయనకు కృతజ్ఞత లేదంటూ ట్రంప్ ట్రూత్ సోషల్ మీడియాలో పోస్ట్ చేశారు. ఖమేనీ ఎక్కడ ఆశ్రయం పొందారో తమకు తెలుసునని.. అమెరికా, ఇజ్రాయెల్ దళాల చేతుల్లో చావకుండా కాపాడామని.. అతి ఘోరమైన చావు నుంచి తానే కాపాడినట్టుగా మాట్లాడారు. అయినా ఖమేనీ తనకు ధన్యవాదాలు తెలుపలేదని ట్రంప్ అన్నారు. ఈ వ్యాఖ్యలతో ఇరు దేశాల మధ్య తీవ్ర దుమారం కొనసాగుతోంది.

తాజాగా ట్రంప్ వ్యాఖ్యలపై ఇరాన్ విదేశాంగ మంత్రి అబ్బాస్ అరఘ్చి తీవ్రంగా మండిపడ్డారు. ఒప్పందం కుదరాలంటే నిజాయితీగా ఉండాలని.. అగౌరవంగా మాట్లాడకూడదని తెలిపారు. లేదంటే ఖమేనీ అభిమానులు, మద్దతుదారులు బాధపడతారని తెలిపారు. ఇరానీయన్లు.. బెదిరింపులు, అవమానాలకు లొంగిపోరని తేల్చి చెప్పారు. కాగా అమెరికాతో అణు చర్చలను తిరిగి ప్రారంభించేదిలేదని స్పష్టం చేశారు.