Telangana High Court: స్థానిక సంస్థల ఎన్నికలపై తీర్పు రిజర్వ్

Telangana High Court On Local Body Elections: తెలంగాణలో పంచాయతీ ఎన్నికల నిర్వహణపై ఉత్కంఠ కొనసాగుతోంది. కాగా స్థానికల సంస్థల ఎన్నికల గురించి పలువురు తెలంగాణ హైకోర్టులో పిటిషన్ వేశారు. ఈ పిటిషన్లను హైకోర్టు ధర్మాసనం విచారణకు స్వీకరించింది. ఈ మేరకు పిటిషనర్లు, ప్రభుత్వం, రాష్ట్ర ఎన్నికల సంఘం వాదనలు పూర్తయ్యాయి. ఈ సందర్భంగా న్యాయస్థానం పలు కీలక వ్యాఖ్యలు చేసింది. ప్రభుత్వం ఎన్ని రోజుల్లో ఎన్నికలు నిర్వహిస్తుందో చెప్పాలని హైకోర్టు ఆదేశించింది. గత ఫిబ్రవరిలోనే ఎన్నికలు నిర్వహిస్తామని చెప్పి.. ఎందుకు చేపట్టలేదో సమాధానం చెప్పాలని ప్రశ్నించింది.

పదవీకాలం ముగిశాక ఆరు నెలల్లో ఎన్నికలు పూర్తి చేయాలనే నిబంధనపై పిటిషనర్లు కోర్టుకు విన్నవించారు. ఎన్నికలైనా పెట్టాలని లేదా పాత సర్పంచ్ లనే కొనసాగించేలా ఆదేశాలు ఇవ్వాలని కోరారు. దీనిపై ప్రభుత్వం కొంత సమయం కావాలని కోర్టును కోరింది. ఎన్నికలు నిర్వహించడానికి మరో 60 రోజులు సమయం కావాలని ఎలక్షన్ కమిషన్ కోరింది. ఈ నేపథ్యంలో హైకోర్టు స్థానిక సంస్థల ఎన్నికలపై తీర్పును రిజర్వ్ చేసింది.