Gujarat Cricket Association: గుజరాత్‌లోనూ టీ20 లీగ్.. త్వరలో వేలం, టీమ్ వివరాల వెల్లడి

T20 Leagues: ప్రపంచవ్యాప్తంగా ఏడాది అంతా టీ20 లీగ్స్‌ జరుగుతూనే ఉన్నాయి. ఐపీఎల్‌ సూపర్ హిట్ కావడంతో పొట్టి క్రికెట్‌కు రోజురోజుకూ ఆదరణ పెరుగుతుండడంతో పలు రాష్ట్రాల బోర్డులు టీ20 లీగ్స్ జరుపుతున్నాయి. ఇప్పటికే ఢిల్లీ, ముంబై, కర్ణాటక, తమిళనాడు, బెంగాల్, ఏపీ క్రికెట్ సంఘాలు లీగ్స్‌ నిర్వహిస్తున్నాయి. త్వరలో ఈ జాబితాలో గుజరాత్ క్రికెట్ సంఘం కూడా చేరనుంది.

తమ రాష్ట్రంలోని యువతను ప్రపంచ స్థాయి క్రీడాకారులుగా తీర్చిదిద్దాలనే లక్ష్యంతో ఉన్న జీసీఏ టీ20 లీగ్ ప్రారంభానికి సన్నాహాకాలు చేస్తోంది. గుజరాత్‌లో కూడా టీ20 ఫ్రాంచైజీ లీగ్ ఏర్పాటు చేయాలని అనుకుంటున్నామని జీసీఏ కార్యదర్శి అనిల్ పటేల్ తెలిపారు. 2025-26 ఎడిషన్‌గా లీగ్‌ను ప్రారంభించాలనే ఆలోచనతో ఉన్నామని తెలిపారు. ఎన్ని జట్లతో టోర్నీ నిర్వహించాలి? ఏయే వేదికలు అనువైనవి? వంటి విషయాలపై చర్చిస్తున్నామన్నారు. త్వరలో అన్ని వివరాలు వెల్లడిస్తామని అనిల్ పటేల్ శుక్రవారం క్రిక్‌బజ్‌కు సమాచారం ఇచ్చారు.

ఐపీఎల్ ఆరంభంతో పొట్టి క్రికెట్‌ రాతే మారిపోయింది. 2008లో మొదలైన టోర్నీ ఇప్పుడు ప్రపంచంలోనే నంబర్-1 ఫ్రాంచైజీ లీగ్‌లో ఒకటి. దీంతో పలు రాష్ట్రాలు సొంతంగా ఫ్రాంచైజీ లీగ్స్‌ నిర్వహిస్తున్నాయి. తద్వారా యువ క్రికెటర్లకు ఐపీఎల్, టీమ్ ఇండియాకు ఆడేందుకు మార్గం సుగమం చేస్తున్నాయి. ఈ మధ్య విదర్భ పొట్టి లీగ్‌కు పచ్చజెండా ఊపింది. ఈ నేపథ్యంలోనే గుజరాత్ క్రికెట్ సంఘం టీ20లీగ్‌తో స్థానికులను అలరించాలని భావిస్తోంది.