Ranya Rao : రన్యారావు పెళ్లికి కర్ణాటక సీఎం సిద్ధరామయ్య.. ఫొటో లీక్‌

Ranya Rao : దుబాయ్‌ నుంచి విమానంలో అక్రమంగా బెంగళూరుకు బంగారాన్ని తీసుకొస్తూ పట్టుబడిన నటి రన్యారావు కేసులో మరో పరిణామం చోటుచేసుకుంది. నటి పెళ్లి వేడుకలో ఆమెతో కలిసి కర్ణాటక సీఎం సిద్ధరామయ్య దిగిన ఫొటో లీక్ అయినట్లు తాజాగా వెలుగులోకి వచ్చింది. బీజేపీ నేత అమిత్‌ మాలవీయ ఫొటోను ఎక్స్‌ వేదికగా షేర్‌ చేశారు.

సిద్ధిరామయ్య ఇంటి వరకు..
రన్యారావు స్మగ్లింగ్‌ కేసుకు సంబంధించిన సమస్య ఇప్పుడు ముఖ్యమంత్రి సిద్ధరామయ్య ఇంటి వరకు వచ్చింది. ఈ ఫొటోలో హోంశాఖ మంత్రి జి.పరమేశ్వర కూడా ఉన్నారు. కేసులో రాజకీయ సంబంధాలు లేవని డిప్యూటీ సీఎం డీకే శివకుమార్‌ కొట్టి పారేశారంటూ అమిత్‌ మాలవీయ విమర్శలు చేశారు. స్మగ్లింగ్‌లో ఆమెతో సంబంధం ఉన్న వ్యక్తులను గుర్తించేందుకు అధికారులు తీవ్ర ప్రయత్నాలు చేస్తున్నారు. రన్యారావుకు సంబంధించిన ప్రదేశాలు, పెళ్లి అయిన హోటల్‌కు వెళ్లి దర్యాప్తు చేస్తున్నారు. నటి వివాహానికి హాజరైన అతిథులు, వారు ఇచ్చిన కానుకలపై దృష్టి సారిస్తున్నారు.

సీఎంపై అనుమానాలు..
ఈ క్రమంలోనే నటి రన్యారావు పెళ్లి వేడుకకు ముఖ్యమంత్రి సిద్ధరామయ్య హాజరైన ఫొటో బయటకు రావడం ఇప్పుడు తీవ్ర చర్చనీయాంశంగా మారింది. స్మగ్లింగ్‌లో ఆయన పాత్రపై అనుమానాలు వ్యక్తమవుతున్నాయి. మరోవైపు నటి బెయిల్‌ కోసం ప్రత్యేక కోర్టులో వాదనలు కొనసాగుతున్నాయి. ఈ నేపథ్యంలో కేసులో మరికొన్ని కీలక విషయాలు బయటకు వస్తున్నాయి. విమానాశ్రయంలో ఆమె తనిఖీలు తప్పించుకునేందుకు సాయం చేసిన అధికారికి.. సంబంధిత శాఖ అధికారుల నుంచి సూచనలు అందాయని న్యాయస్థానానికి డీఆర్‌ఐ తెలిపింది.

ఇటీవల దుబాయ్‌ నుంచి బెంగళూరుకు 14.2 కిలోల బంగారంతో వచ్చిన నటిని విమానాశ్రయం నుంచి నిష్ర్కమించే చివరి నిమిషంలో అధికారులు అరెస్టు చేసిన సంగతి తెలిసిందే. తరచూ దుబాయ్‌కు వెళ్లడం.. వెళ్లిన ప్రతిసారీ ఒకే రకమైన దుస్తులు ధరించడంతో అనుమానం వచ్చి ఆమెపై నిఘా పెట్టగా, స్మగ్లింగ్‌ వ్యవహారం బయటపడింది. దీంతో పోలీసులు దర్యాప్తు ముమ్మరం చేశారు.