TGTET Exam: జూన్ 18 నుంచి టెట్ ఎగ్జామ్స్.. షెడ్యూల్ ఇదే!

TG TET 2025 Exam Schedule: తెలంగాణ రాష్ట్ర ప్రభుత్వం నిర్వహించే టీచర్ ఎలిజిబిలిటీ టెస్ట్ (టెట్) 2025 పరీక్షల షెడ్యూల్ ను పాఠశాల విద్యాశాఖ విడుదల చేసింది. జూన్ 18 నుంచి 30 వరకు రాష్ట్రవ్యాప్తంగా రెండు షిఫ్టుల్లో జరగనున్నాయి. టెట్ పరీక్షలను రెండు పేపర్లుగా విభజించారు. అభ్యర్థుల సౌకర్యార్థం జిల్లాల వారీగా పరీక్షల తేదీలు, సబ్జెక్టులను అధికారులు కేటాయించారు.

కాగా పరీక్షలు ప్రతిరోజు ఉదయం 9 గంటల నుంచి 11.30 గంటల వరకు ఒక షిఫ్ట్, మధ్యాహ్నం 2 గంటల నుంచి సాయంత్రం 4.30 గంటల వరకు మరో షిఫ్ట్ లో నిర్వహించనున్నారు. పరీక్షను ఇంగ్లీష్, తెలుగు భాషల్లో నిర్వహిస్తుండగా, కొన్ని సబ్జెక్టుల్లో హిందీ, కన్నడం, తమిళం, ఉర్దూ, మరాఠీ, బెంగాళీ, సంస్కృతం భాషలకు అనుమతినిచ్చారు. జూన్ 18న ప్రారంభమయ్యే టెట్ పరీక్షలు మొదటగా మ్యాథ్స్, సైన్స్ (పేపర్-2) పరీక్షతో ప్రారంభం కానున్నాయి. వరుసహా 16 సెషన్లలో వివిధ సబ్జెక్టులకు పరీక్షలు నిర్వహించనున్నారు. చివరి రోజు జూన్ 30న మైనార్టీ భాషల్లో పేపర్-2 మ్యాథ్స్, సైన్స్, సోషల్ స్టడీస్ పరీక్షలు జరగనున్నాయి.

అయితే పరీక్షల హాల్ టికెట్లలో ప్రతి జిల్లాలోని కేంద్రాలను స్పష్టంగా పేర్కొంటూ, సంబంధిత సబ్జెక్టుల పరీక్షలు ఏ తేదీన జరిగేలా కేటాయించారో అభ్యర్థులకు తెలపనున్నారు. టెట్ కోసం హైదరాబాద్, వరంగల్, ఖమ్మం, నిజామాబాద్, నల్గొండ, సిరిసిల్ల, మంచిర్యాల, ములుగు, మహబూబ్ నగర్, మెదక్, జగిత్యాల, సంగారెడ్డి, మేడ్చల్ జిల్లాల్లో పరీక్ష కేంద్రాలు ఏర్పాటు చేసినట్టు షెడ్యూల్ లో తెలిపారు. అభ్యర్థులకు కేటాయించిన తేదీల ప్రకారం పరీక్షకు హాజరుకావాలని అధికారులు సూచించారు. త్వరలోనే పరీక్షకు సంబంధించిన హాల్ టికెట్లు విడుదల చేస్తామని, అభ్యర్థులు అధికారిక వెబ్ సైట్ ద్వారా డౌన్లోడ్ చేసుకోవచ్చని తెలిపారు. పరీక్షల నిర్వహణకు అన్ని ఏర్పాట్లు పూర్తయ్యాయని, ఎలాంటి ఇబ్బందులు లేకుండా అన్ని చర్యలు తీసుకుంటున్నామని వెల్లడించారు.