Gaddar Award: ‘గద్దర్’ విన్నర్లకు భారీ ప్రైజ్ మనీ.. అసలు ఎంతంటే!

Telangana: గద్దర్ తెలంగాణ ఫిల్మ్ అవార్డులకు భారీగా ప్రైజ్ మనీ అందనుంది. నంది అవార్డుల కంటే ప్రైజ్ మనీని భారీగా పెంచింది తెలంగాణ సర్కార్. దీని ప్రకారం ఒక్కో ఉత్తమ చిత్రానికి పురస్కారంతోపాటు రూ. 10 లక్షల ప్రైజ్ మనీ లభించనుంది. అలాగే వ్యక్తిగత అవార్డుల్లోనూ ఒక్కో పురస్కారానికి రూ. 3 నుంచి రూ. 5 లక్షల వరకు చొప్పున నగదు అందనుంది. అలాగే ప్రత్యేక పురస్కారాల్లో ఒక్కో స్మారక అవార్డుకు రూ. 10 లక్షల ప్రోత్సాహక నగదు లభించనుంది. గద్దర్ తెలంగాణ ఫిల్మ్ అవార్డుల్లో భాగంగా మొత్తం 73 పురస్కారాలను తెలంగాణ ప్రభుత్వం అందించనుంది. ఇందుకోసం ప్రభుత్వం రూ. 4.5 కోట్లు ఖర్చు చేయనుంది.

ఈ క్రమంలో మొత్తం 11 ఉత్తమ చిత్రాలకు గానూ, ఒక్కో చిత్రానికి రూ. 10 లక్షలు, రెండో ఉత్తమ చిత్రాలకు ఒక్కోదానికి రూ. 7 లక్షలు, మూడో ఉత్తమ చిత్రాలకు ఒక్కో చిత్రానికి రూ. 5 లక్షల చొప్పున ప్రోత్సాహక బహుమతి అందించనున్నారు. అయితే గద్దర్ అవార్డుల కోసం మొత్తం 1248 నామినేషన్లు రాగా వాటిని పరిశీలించిన అనంతరం అవార్డు గ్రహీతల పేర్లను ప్రకటించారు. సుమారు 14 ఏళ్ల తర్వాత ప్రభుత్వం సినిమా పురస్కారాలను అందించనుంది. జూన్ 14న హైదరాబాద్ హైటెక్స్ లో జరిగే గద్దర్ ఫిలిం అవార్డుల ప్రదానోత్సవం 2024 జరగనుంది.