Actor Navdeep : తెలంగాణ హైకోర్టు డ్రగ్స్ కేసులో నటుడు నవదీప్ నకు ఊహించని షాకిచ్చింది. మాదాపూర్ ప్రెష్ లివింగ్ అపార్ట్ మెంట్ లో జరిగిన డ్రగ్స్ పార్టీలో హీరో నవదీప్ డ్రగ్స్ తీసుకున్నట్టుగా పోలీసులు ఆరోపిస్తున్నారు. ఈ క్రమంలోనే ఆయన్ని 29వ నిందితుడిగా పోలీసులు చేర్చారు. కాగా ఈ ఆరోపణలను నవదీప్ తోసిపుచ్చుతున్నారు. డ్రగ్స్ కేసు ఎప్పుడూ తెరమీదికి వచ్చినా తన పేరును చేర్చుతున్నారని.. తాను ఎక్కడికి పారిపోలేదని నవదీప్ వ్యాఖ్యానించారు.
ఈ నెల 19వ తేదీ వరకు అరెస్ట్ చేయవద్దని హైకోర్టు ఆదేశాలు జారీ చేసింది. ఈ గడువు తీరడంతో నిన్న నవదీప్ నివాసంలో నార్కోటిక్స్ బ్యూరో అధికారులు సోదాలు నిర్వహించారు. దీంతో మరో పిటిషన్ ను దాఖలు చేశారు. తాజాగా ఇప్పుడు నవదీప్ దాఖలు చేసిన పిటిషన్ ను తెలంగాణ హైకోర్టు కొట్టివేసింది. 41 ఏ సెక్షన్ కింద నవదీప్ నకు నోటీసు ఇవ్వాలని ఆదేశించింది.
ఈ పిటిషన్ పై ఇరు వర్గాల వాదనలను హైకోర్టుకు వినిపించారు. నవదీప్ పై గతంలో కూడ కొన్ని కేసులున్నాయని పోలీసుల తరపు న్యాయవాది వాదించారు. అయితే ఈ వాదనలను నవదీప్ న్యాయవాది తోసిపుచ్చారు. ఆయనను ఏ కేసులోనూ దోషిగా తేలలేదని వివరించారు. ఇరువర్గాల వాదనలు విన్న తర్వాత నవదీప్ పిటిషన్ ను హైకోర్టు కొట్టివేసింది. నవదీప్ నకు 41 ఏ సెక్షన్ కింద నోటీసు ఇచ్చి విచారణ జరపాలని కోరింది. ప్రస్తుతం ఈ విషయం సినీ వర్గాల్లో హాట్ టాపిక్ గా మారింది.