Sunil Kanugolu: కాంగ్రెస్ వార్ రూమ్ కేసు.. విచారణకు హాజరైన సునీల్ కనుగొలు

Thammella Kalyan

2 years ago

Sunil Kanugolu: కాంగ్రెస్ వార్ రూమ్ కేసులో మొదటి సారి సైబర్ క్రైమ్ పోలీసులు ముందు.. పార్టీ వ్యూహకర్త సునీల్ కనుగొలు హాజరయ్యారు. నేడు బంజారాహిల్స్ లోని కమాండ్ కంట్రోల్ రూమ్ లో సైబర్ క్రైం పోలీసుల ఎదుట హాజరయ్యారు. విచారణలో భాగంగా సునీల్ కనుగోలు స్టేట్ మెంట్ ను పోలీసులు రికార్డ్ చేస్తున్నారు. గతంలో సీఎం కేసీఆర్, కేటీఆర్ కవితలపై సోషల్ మీడియాలో కించపరిచేలా వ్యాఖ్యలు చేసినందుకు సైబర్ క్రైం పోలీసులు పలు సెక్షన్ల కింద కేసులు నమోదు చేశారు.

సీఎం కేసీఆర్ పై అభ్యంతకర పోస్టులు

గత నెల డిసెంబర్ 27న విచారణకు హాజరు కావాల్సిందిగా పోలీసులు 41A ప్రకారం నోటీసులు జారీ చేశారు. ఈ విచారణకు అనారోగ్య సమస్యలతో హాజరు కాలేనని సునీల్ కనుగోలు హై కోర్టులో సవాల్ చేశారు. ఈ పిటిషన్ పై విచారణ జరిపిన కోర్టు 41A నోటీసులు పై స్టే ఇవ్వలేమని హైకోర్టు తేల్చి చెప్పింది. విచారణకు సహకరించాల్సిందిగా సునీల్ కనుగోలు (Sunil Kanugolu) కు హై కోర్టు సూచించింది. ఈ కేసులో భాగంగా సునీల్ కనుగోలు అరెస్ట్ చేయవద్దని.. కేవలం విచారణ మాత్రమే చేయాలని కోర్టు సూచించింది. దీంతో ఆయన సోమవారం సైబర్ క్రైం పోలీసులు ఎదుట హాజరయ్యారు. హై కోర్టు ఇచ్చిన సూచనలతోనే సునీల్ కనుగోలును విచారిస్తున్నామని.. సైబర్ క్రైం పోలీసులు తెలిపారు.

విచారణలో ఏం తేలనుంది?

కాంగ్రెస్ వార్ రూమ్ వేదికగా.. సీఎం కేసీఆర్, కేటీఆర్, కవితలపై అభ్యంతకర పోస్టుల్లో సునీల్ పాత్ర ఉందంటు సైబర్ క్రైం పోలీసులు అభియోగాలు నమోదు చేశారు. ఈ విచారణ అనంతరం మరిన్ని విషయాలు వెలుగులోకి వచ్చే అవకాశం ఉన్నట్లు పోలీసులు తెలిపారు.