West Bengal: పశ్చిమ బెంగాల్ ముఖ్యమంత్రి మమతా బెనర్జీకి పెద్ద షాక్. ఎన్‌ఫోర్స్‌మెంట్ డైరెక్టరేట్ మంగళవారం టీఎంసీ ఎమ్మెల్యే, పశ్చిమ బెంగాల్ ప్రాథమిక విద్యా బోర్డు మాజీ అధ్యక్షుడు మాణిక్ భట్టాచార్యను టీచర్ల రిక్రూట్‌మెంట్ స్కామ్‌కు సంబంధించి అధికారికంగా అరెస్టు చేసింది. ఈ కేసుకు సంబంధించి రాత్రంతా ప్రశ్నించిన తర్వాత కేంద్ర ఏజెన్సీ భట్టాచార్యను అరెస్టు చేసింది.
రాష్ట్ర ప్రాథమిక విద్యా మండలి మాజీ ఛైర్మన్‌గా ఉన్న ఆయనను కలకత్తా హైకోర్టు జూన్‌లో తన పదవి నుంచి తొలగించింది. టీచర్ల రిక్రూట్‌మెంట్ స్కామ్‌కు సంబంధించి పార్థ ఛటర్జీ తర్వాత ఇది రెండవ అరెస్టు కావడం గమనార్హం. రాష్ట్ర ప్రైమరీ టీచర్ల నియామకానికి సంబంధించి టీచర్ ఎలిజిబిలిటీ టెస్ట్ (టెట్)లో జరిగిన అవకతవకలకు సంబంధించి భట్టాచార్య పై సీబీఐ ఆగస్టులో లుకౌట్ నోటీసు జారీ చేసింది. కుంభకోణంలో భట్టాచార్య పేరు బయటకు వచ్చిన వెంటనే, అతనికి ఇక పై పోలీసు భద్రత కల్పించనున్నట్లు రాష్ట్ర పోలీసులు తెలిపారు. టీచర్ల రిక్రూట్‌మెంట్‌లో విస్తృతంగా అవినీతి జరిగిందని ఆరోపణలపై పశ్చిమ బెంగాల్ బోర్డ్ ఆఫ్ ప్రైమరీ ఎడ్యుకేషన్ చైర్మన్ పదవి నుండి భట్టాచార్యను తొలగించాలని కలకత్తా హైకోర్టు గతంలో ఆదేశించింది.
ఆ తర్వాత భట్టాచార్యను ఎన్‌ఫోర్స్‌మెంట్ డైరెక్టరేట్ (ఈడీ) విచారించింది. పశ్చిమ బెంగాల్ స్కూల్ సర్వీస్ కమిషన్ (డబ్ల్యుబిఎస్‌ఎస్‌సి) రిక్రూట్‌మెంట్ స్కామ్‌లో అప్పటి విద్యాశాఖ మంత్రి పార్థ ఛటర్జీ, అతని సన్నిహితురాలు అర్పితా ముఖర్జీని ఈడీ ఇప్పటికీ అరెస్టు చేసింది. ఛటర్జీ మరియు ముఖర్జీలను అరెస్టు చేసిన తర్వాత ఈడీ భట్టాచార్యను విచారణకు పిలిచింది. ఈ కుంభకోణానికి సంబంధించి పశ్చిమ బెంగాల్ స్కూల్ సర్వీస్ కమిషన్ (డబ్ల్యూబిఎస్‌ఎస్‌సి) మాజీ సలహాదారు శాంతి ప్రసాద్ సిన్హా, డబ్ల్యుబిఎస్‌ఎస్‌సి మాజీ ఛైర్మన్ అశోక్ సాహా, డబ్ల్యుబిఎస్‌ఎస్‌సి మాజీ అధ్యక్షుడు కళ్యాణ్‌మోయ్ గంగూలీలను సిబిఐ అరెస్టు చేసింది.