Sameer Wankhede: ఎన్‌సిబి మాజీ అధికారి సమీర్ వాంఖడే ను ఐదుగంటలకు పైగా ప్రశ్నించిన సీబీఐ

Sameer Wankhede:  ముంబై నార్కోటిక్స్ కంట్రోల్ బ్యూరో మాజీ అధికారి సమీర్ వాంఖడే ను షారూఖ్ ఖాన్ నుండి రూ. 25 కోట్ల లంచం డిమాండ్ చేసిన ఆరోపణలపై సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) ఆదివారం ఐదు గంటలకు పైగా ప్రశ్నించింది.

సత్యమేవ్ జయతే.. (Sameer Wankhede)

సీబీఐ కార్యాలయం వెలుపల వేచి ఉన్న మీడియా ప్రతినిధుల ప్రశ్నలకు వాంఖడే స్పందించలేదు, కానీ సత్యమేవ్ జయతే (సత్యమే గెలుస్తుంది) అని మాత్రమే అన్నారు.
వాంఖడే ఆదివారం ఉదయం 10.30 గంటలకు బాంద్రా-కుర్లా కాంప్లెక్స్‌లోని సీబీఐ కార్యాలయానికి చేరుకున్నారు. కార్యాలయంలోకి ప్రవేశిస్తున్నప్పుడు, వాంఖడే మీడియాతో మాట్లాడుతూ న్యాయవ్యవస్థపై తనకు నమ్మకం ఉందని అన్నారు. విచారణ అనంతరం సాయంత్రం 4.30 గంటలకు వాంఖడే సిబిఐ కార్యాలయం నుండి బయలుదేరారు.

శనివారం వాంఖడేను సీబీఐ ఐదు గంటలకు పైగా ప్రశ్నించింది. శనివారం విచారణ అనంతరం వాంఖడే తన కుటుంబ సభ్యులతో కలిసి ముంబైలోని ప్రభాదేవి వద్ద ఉన్న సిద్ధివినాయక ఆలయాన్ని సందర్శించారు.నార్కోటిక్స్ కంట్రోల్ బ్యూరో (ఎన్‌సిబి) చేసిన ఫిర్యాదుపై అవినీతి నిరోధక చట్టం కింద లంచానికి సంబంధించిన నిబంధనలతో పాటు నేరపూరిత కుట్ర మరియు బలవంతపు బెదిరింపుల కింద వాంఖడేతో పాటు మరో నలుగురిపై మే 11న సీబీఐ కేసు నమోదు చేసింది.శుక్రవారం, వాంఖడేకు బొంబాయి హైకోర్టు నుండి ఉపశమనం లభించింది, మే 22 వరకు అతనిపై అరెస్టు వంటి బలవంతపు చర్య తీసుకోవద్దని సీబీఐని ఆదేశించింది.