ఒడిశా: పోలీసులకు లొంగిపోయిన 600 మంది మావోయిస్టు మద్దతుదారులు.. ఎందుకంటే..?

Odisha: ఒడిశాలో మావోయిస్టులకు మద్దతుగా నిలిచిన 600 మందికి పైగా చురుకైన మిలీషియా సభ్యులు పోలీసులకు, మల్కన్‌గిరిలో బీఎస్‌ఎఫ్‌కి లొంగిపోయారు. వీరు మల్కన్‌గిరి జిల్లాలోని చీటకొండ బ్లాక్‌లోని వివిధ గ్రామాలకు చెందినవారు, ఇవి ఒకప్పుడు మావోయిస్టులకు బలమైన స్దావరాలుగా ఉండేవి. ఈ మిలీషియా సభ్యులు మావోయిస్టుల హింసాత్మక కార్యకలాపాలకు సహకరించేవారు. వారికి లాజిస్టిక్స్ సరఫరా చేసేవారు.

లొంగుబాటు సందర్భంగా మిలీషియా సభ్యులు యూనిఫారాలు, దిష్టిబొమ్మలను దహనం చేసి మావోయిస్టు సిద్ధాంతంపై తమ వ్యతిరేకతను ప్రదర్శించారు. వేదిక వద్ద ఉన్న పెద్ద ఎత్తున మీడియా ప్రతినిధుల ముందు వారు మావోయిస్టులకు వ్యతిరేకంగా నినాదాలు చేశారు.రాష్ట్ర ప్రభుత్వం మాకు అనేక సంక్షేమ పథకాలు అందిస్తోంది. ఆరోగ్యం, విద్య, తదితర పథకాలను సద్వినియోగం చేసుకుంటున్నాం. పోలీసులు, బీఎస్‌ఎఫ్‌లు మాతో పాటు మా ప్రాణాలకు, ఆస్తులకు భద్రత కల్పిస్తున్నారు. దీన్ని దృష్టిలో ఉంచుకుని, మేము పోలీసులకు సహాయం చేసాము. సమాజంలోని ప్రధాన స్రవంతిలో చేరాము” వారు చెప్పారు.

ఒడిశా ప్రభుత్వ అభివృద్ధి కార్యక్రమాలు, భద్రతా బలగాల వ్యూహాత్మక మోహరింపు గ్రామస్తులను ప్రధాన స్రవంతిలో చేరడానికి ప్రేరేపించాయని అధికారులు కూడా చెబుతున్నారు. కొత్త రోడ్లు, వంతెనలు, వైద్య సదుపాయాలు, మొబైల్ టవర్ల ఏర్పాటు మరియు ఈ ప్రాంతంలోని అన్ని ఇళ్లకు తాగునీరు మరియు విద్యుత్ సరఫరా చేసే ప్రాజెక్టుల వంటి అనేక అభివృద్ధి పనులు ఇప్పటివరకు అమలు చేయబడ్డాయి.ఈ అభివృద్ధి పనులు మరియు భద్రతా బలగాల ఉనికి మావోయిస్టు మిలీషియా మరియు సానుభూతిపరులు ప్రధాన స్రవంతిలో చేరడానికి ప్రేరేపించాయని మల్కన్‌గిరి పోలీసు సూపరింటెండెంట్ నితేష్ వాధ్వానీ అన్నారు.

ఏడాది వ్యవధిలోనే రెండు వేల మందికి పైగా మావోయిస్టు మద్దతుదారులు మల్కన్‌గిరి పోలీసులకు లొంగిపోయినట్లు సమాచారం. మావోయిస్టులు పోలీసులకు లొంగిపోతే వారి క్యాడర్ ప్రకారం రివార్డు మొత్తం అందజేస్తారు. లొంగిపోయినప్పుడు ఏరియా కమిటీ సభ్యుడు (ACM) రూ. 4 లక్షలు మరియు అంతకంటే ఎక్కువ పొందుతారు. అదేవిధంగా సాధారణ సభ్యుడికి రూ.లక్ష రివార్డ్ అమౌంట్ లభిస్తుంది. రాష్ట్ర ప్రభుత్వ పునరావాస పథకం ద్వారా, వారికి విద్య, ఆరోగ్యం మరియు నైపుణ్యాభివృద్ధిలో శిక్షణ ఇవ్వడం ద్వారా వారు ముందుకు సాగుతున్నారు.