Supreme Court Notices: మాజీ ఎంపీ ఆనంద్ మోహన్ ను జైలు నుంచి విడుదల చేయడంపై బీహార్ ప్రభుత్వానికి సుప్రీంకోర్టు నోటీసులు

Supreme Court Notices: మాజీ ఎంపీ ఆనంద్ మోహన్‌ను జైలు నుంచి ముందస్తుగా విడుదల చేయడంపై సుప్రీంకోర్టు సోమవారం బీహార్ ప్రభుత్వానికి నోటీసులు జారీ చేసింది.ఐఏఎస్ అధికారి జి కృష్ణయ్య హత్య కేసులో జీవిత ఖైదు పడిన ఆనంద్ మోహన్, బీహార్ జైలు నిబంధనల సవరణతో గత నెలలో సహర్సా జైలు నుంచి బయటకు వచ్చారు.

ఉమా కృష్ణయ్య పిటిషన్‌ తోనే..(Supreme Court notices)

అతడిని ముందస్తుగా విడుదల చేయడాన్ని సవాల్ చేస్తూ హత్యకు గురైన ఐఏఎస్ అధికారి భార్య ఉమా కృష్ణయ్య దాఖలు చేసిన పిటిషన్‌ను విచారించిన సందర్భంగా అత్యున్నత న్యాయస్థానం ఈ ఆదేశాలు జారీ చేసింది.అంతకుముందు, ఆనంద్ మోహన్‌ను విడిపించే జైలు నిబంధనలను సవరించడానికి నితీష్ కుమార్ నేతృత్వంలోని బీహార్ ప్రభుత్వం తీసుకున్న చర్యపై కేంద్ర పౌర సేవల అధికారులకు ప్రాతినిధ్యం వహిస్తున్న ఒక బృందం “తీవ్రమైన నిస్పృహ” వ్యక్తం చేసింది, ఇది న్యాయ నిరాకరణతో సమానం అని పేర్కొంది.ఆనంద్ మోహన్ అకాల విడుదల బీహార్‌లో జంగిల్ రాజ్ తిరిగి వస్తుందని ప్రతిపక్ష పార్టీలు ఆరోపించడంతో రాజకీయ దుమారం రేగింది.

ఆనంద్ మోహన్ డిసెంబర్ 5, 1994న గోపాల్‌గంజ్ జిల్లా మేజిస్ట్రేట్ జి కృష్ణయ్య హత్య కేసులో దోషిగా నిర్ధారించబడ్డాడు. అతను రెచ్చగొట్టడంతో అల్లరిమూక కృష్ణయ్యను తన  కారులోంచి బయటకు లాగి కొట్టి చంపారు.ఆనంద్ మోహన్‌కు 2007లో ట్రయల్ కోర్టు మరణశిక్ష విధించింది. ఏడాది తర్వాత, పాట్నా హైకోర్టు ఆ శిక్షను యావజ్జీవ కారాగార శిక్షగా మార్చింది. ఆ తర్వాత అతను సుప్రీంకోర్టులో తీర్పును సవాలు చేశాడు, కానీ ఇంకా ఉపశమనం లభించలేదు.  అతను 2007 నుండి సహర్సా జైలులో ఉన్నాడు.