Sikkim Floods : సిక్కిం వరదల్లో విషాదం.. 14 మంది మృతి, 102 మంది గల్లంతు

Sikkim Floods : సిక్కింలో సంభవించిన వరదల కారణంగా తీవ్ర నష్టం వాటిల్లింది. మంగళవారం రాత్రి నుంచి మొదలైన ఈ వరదలు బుధవారం కూడా ఉధృతంగా సాగడంతో ప్రజలు ఇబ్బందులు ఎదుర్కోవాల్సి వస్తుంది. కాగా ఇప్పటికీ వరదల్లో 14 మంది మరణించగా.. మరో 102 మంది గల్లంతయ్యారు. అదే విధంగా ఈ వరదల్లో 26 మంది గాయపడగా.. మరో 2 వేల మందిని సురక్షిత ప్రాంతాలకు తరలించారు.

ఈ వరదల ధాటికి 11 వంతెనలు కొట్టుకుపోయాయి. 22వేల మంది వరద బారినపడ్డారని సిక్కిం అధికారులు చెప్పారు. ఆర్మీ, నేషనల్ డిజాస్టర్ రెస్పాన్స్ ఫోర్స్ నేతృత్వంలో పలు ఏజెన్సీలు ప్రభావిత ప్రాంతాల్లో శోధన కార్యకలాపాలను నిర్వహిస్తున్నాయి. భారత వైమానిక దళం కూడా సిద్ధంగా ఉంది. తూర్పు సిక్కింలోని పాక్యోంగ్, హిమాలయాల దిగువన అత్యధిక మరణాలు సంభవించాయి. మొత్తంగా ఏడు జిల్లాలో 59 మంది గల్లంతయ్యారు. వీరిలో 23 మంది ఆర్మీ సిబ్బంది కూడా ఉన్నారు. 3,000 మందికి పైగా పర్యాటకులు రాష్ట్రంలోని వివిధ ప్రాంతాలలో చిక్కుకుపోయారు. వాయువ్య సిక్కింలోని ల్హోనాక్ సరస్సుపై మేఘాలు విస్ఫోటనం చెందడంతో నీటి మట్టాలు పెరిగాయని సిక్కిం ముఖ్య కార్యదర్శి విబి పాఠక్ చెప్పారు.

సరస్సు పొంగి ప్రవహించి బంగ్లాదేశ్‌ లోకి ప్రవేశించే ముందు సిక్కిం, పశ్చిమ బెంగాల్ గుండా ప్రవహించే తీస్తా నదిలో వరద నీరు ప్రవహించింది. రోడ్లు, వంతెనలు కొట్టుకుపోయాయి. రాష్ట్ర అధికారులు ఆహార సరఫరా కొరత గురించి భయపడుతున్నారు. సిక్కిం ప్రభుత్వం రాష్ట్రంలో హై అలర్ట్ ప్రకటించి తీస్తా నదికి దూరంగా ఉండాలని ప్రజలను కోరింది. పశ్చిమ బెంగాల్‌లోని జల్పాయ్ గురి పరిపాలన ముందుజాగ్రత్త చర్యగా నది దిగువ పరివాహక ప్రాంతం నుండి ప్రజలను తరలించడం ప్రారంభించింది. రానున్న రెండు రోజుల పాటు గ్యాంగ్‌టక్, గ్యాల్‌షింగ్, పాక్యోంగ్ మరియు సోరెంగ్ జిల్లాలో భారీ వర్షాలు కురిసే అవకాశం ఉందని భారత వాతావరణ శాఖ ఆరెంజ్ అలర్ట్ ప్రకటించింది. మంగన్ మరియు నామ్చి జిల్లాల్లో అతి భారీ వర్షాలు కురుస్తాయని రెడ్ అలర్ట్ ప్రకటించారు.

పశ్చిమ బెంగాల్ ముఖ్యమంత్రి మమతా బెనర్జీ రాష్ట్రంలోని ఉత్తర ప్రాంతాల ప్రజలను గరిష్టంగా అప్రమత్తంగా ఉండాలని విజ్ఞప్తి చేశారు. కాలింపాంగ్, డార్జిలింగ్ మరియు జల్పాయిగురి జిల్లాల్లోని ప్రజలను సురక్షిత ప్రాంతాలకు తరలించడానికి అన్ని చర్యలు తీసుకున్నట్లు” హామీ ఇచ్చారు.ఈ ఏడాది జూన్‌లో ఉత్తర సిక్కిం జిల్లా భారీ రుతుపవన వర్షాల కారణంగా భారీ వరదలను ఎదుర్కొంది. పెగాంగ్ ప్రాంతంలో వరదలతో NH10ని పూర్తిగా మూసివేసారు. హైవే వెంబడి ఉన్న మౌలిక సదుపాయాలకు భారీ నష్టం వాటిల్లింది. తీవ్ర వర్షపాతం కారణంగా సమీపంలోని నదులు పొంగిపొర్లడం వల్ల లాచెన్ మరియు లాచుంగ్ వంటి ప్రాంతాలు రాష్ట్రంలోని మిగిలిన ప్రాంతాల నుండి తెగిపోయాయి. ఆకస్మిక వరదల కారణంగా దాదాపు 2,400 మంది పర్యాటకులు ఈ ప్రాంతంలో చిక్కుకుపోయారు. సహాయక చర్యల కోసం సైన్యాన్ని రప్పించారు.