Patanjali Ayurveda: తప్పుడు ప్రకటనలు చేస్తే ప్రతి ప్రొడక్టుపై కోటిరూపాయలు జరిమానా.. పతంజలి ఆయుర్వేద కు సుప్రీంకోర్టు హెచ్చరికలు

Patanjali Ayurveda: యాడ్స్‌లో తప్పుదారి పట్టించే క్లెయిమ్‌లపై యోగా గురువు రామ్‌దేవ్ నేతృత్వంలోని పతంజలి ఆయుర్వేదాన్ని సుప్రీంకోర్టు హెచ్చరించింది. ఒక నిర్దిష్ట వ్యాధిని నయం చేయగలదని తప్పుడు క్లెయిమ్ చేస్తే, ప్రతి ప్రొడక్టుపై రూ. 1 కోటి రూపాయలు జరిమానా విధించబడుతుందని తెలిపింది.

అల్లోపతి వైద్యులపై విమర్శలు వద్దు..(Patanjali Ayurveda)

యోగా గురువు రామ్‌దేవ్ సహ-స్థాపన చేసిన పతంజలి ఆయుర్వేద్ అనే సంస్థ, టీకా డ్రైవ్‌కు వ్యతిరేకంగా రామ్‌దేవ్ చేసిన దుష్ప్రచారాన్ని ఆరోపిస్తూ ఇండియన్ మెడికల్ అసోసియేషన్ (ఐఎంఏ) చేసిన పిటిషన్‌పై ఈ ఏడాది ఆగస్టు 23న అత్యున్నత న్యాయస్థానం నోటీసు జారీ చేసింది. పతంజలితో పాటు కేంద్ర ఆరోగ్య మంత్రిత్వ శాఖ, ఆయుష్ మంత్రిత్వ శాఖకు కూడా నోటీసులు జారీ చేసింది.అలాంటి తప్పుడు మరియు తప్పుదోవ పట్టించే ప్రకటనలను వెంటనే నిలిపివేయాలని పతంజలి ఆయుర్వేదాన్ని సుప్రీంకోర్టు మంగళవారం కోరింది. అటువంటి ఉల్లంఘనలను కోర్టు చాలా సీరియస్‌గా తీసుకుంటుంది అని ఇండియన్ మెడికల్ అసోసియేషన్ (ఐఎంఏ) పిటిషన్‌ను విచారిస్తున్నప్పుడు న్యాయమూర్తులు అహ్సానుద్దీన్ అమానుల్లా, ప్రశాంత్ కుమార్ మిశ్రాలతో కూడిన ధర్మాసనం వ్యాఖ్యానించింది.ఆధునిక వైద్య విధానాలకు వ్యతిరేకంగా తప్పుదారి పట్టించే వాదనలు మరియు ప్రకటనలను ప్రచురించవద్దని పతంజలి ఆయుర్వేదాన్ని బెంచ్ కోరింది.అల్లోపతి ప్రాక్టీషనర్లను విమర్శించినందుకు రామ్‌దేవ్‌పై అత్యున్నత న్యాయస్థానం తీవ్రంగా విరుచుకుపడింది.

మెడికల్ మాఫియా టార్గెట్ చేసింది..

ఇలాఉండగా మెడికల్ మాఫియా తనను లక్ష్యంగా చేసుకుని వారిపై దుష్ప్రచారం చేస్తోందని యోగా గురువు బాబా రామ్‌దేవ్ బుధవారం పేర్కొన్నారు.మేము తప్పుడు క్లెయిమ్‌ల ఆధారంగా పతంజలి ఆయుర్వేద ఉత్పత్తులను ప్రచారం చేయడం లేదు. ఐదేళ్లుగా మమ్మల్ని లక్ష్యంగా చేసుకున్నారు. మేము ఆయుర్వేద సహాయంతో వ్యాధులను నియంత్రించడానికి మరియు నయం చేయడానికి ప్రయత్నిస్తున్నాము, కానీ నిరంతరంగా మెడికల్ మాఫియాచే టార్గెట్ చేయబడ్డామని బాబా రామ్‌దేవ్ అన్నారు.డబ్బు నిజం మరియు అబద్ధాన్ని నిర్ణయించదు. వారికి (అల్లోపతి) ఎక్కువ ఆసుపత్రులు, వైద్యులు ఉండవచ్చు. కానీ మాకు ఋషుల జ్ఞానం యొక్క వారసత్వం ఉందని బాబా రామ్‌దేవ్ అన్నారు.