President of Bharath: G20 డిన్నర్‌ ఆహ్వానంపై ప్రెసిడెంట్ ఆఫ్ భారత్ అని ముద్రణ

President of Bharath: ఇండియా అన్న పేరుని భారత్‌గా మార్చేందుకు మోదీ సర్కార్ సిద్ధమైందా.? దానికి రంగం సిద్దం చేసిందా.? ఇండియా పేరిట కూటమి ఏర్పాటు చేసిన ప్రతిపక్షాలకి షాక్ ఇచ్చేందుకు మోదీ సర్కార్ ఎత్తులు వేస్తోందా అంటే అవున్న సమాధానమే వస్తోంది.

భారత్‌ అధ్యక్షతన ఈ వారాంతంలో జీ-20 శిఖరాగ్ర సదస్సు జరగనుంది. ఈ సమావేశానికి ప్రపంచ వ్యాప్తంగా పలు దేశాల అధినేతలు హాజరుకానున్నారు. ఈ నేపథ్యంలోనే వీరికి రాష్ట్రపతి ద్రౌపదీ ముర్ము సెప్టెంబరు 9వ తేదీన ప్రత్యేక విందు ఏర్పాటు చేశారు. ఇందుకోసం రాష్ట్రపతి భవన్‌ నుంచి ఇప్పటికే అతిథులకు ఆహ్వానం అందింది. అయితే, ఈ ఆహ్వానంపై ప్రెసిడెంట్ ఆఫ్ ఇండియా బదులుగా ప్రెసిడెంట్ ఆఫ్ భారత్ అని ముద్రించి ఉండటం ప్రాధాన్యత సంతరించుకుంది.

కాంగ్రెస్ విమర్శలు..(President of Bharath)

తమకు అందిన ఆహ్వానంలో ఈ మార్పును గుర్తించిన కాంగ్రెస్‌ పార్టీ ట్విటర్‌ వేదికగా కేంద్ర ప్రభుత్వంపై విమర్శలు గుప్పించింది. జీ-20 విందు కోసం ప్రెసిడెంట్ ఆఫ్ ఇండియాకి బదులుగా ప్రెసిడెంట్ ఆఫ్ భారత్ అనే పేరుతో రాష్ట్రపతి భవన్‌ ఆహ్వానం పంపింది. రాజ్యాంగంలోని ఆర్టికల్‌ 1లో.. భారత్‌, అది ఇండియా, రాష్ట్రాల సమాఖ్య అని రాసి ఉంటుంది. కానీ, ఇప్పుడు ఈ రాష్ట్రాల సమాఖ్యపైనా దాడి జరుగుతోంది అని కాంగ్రెస్‌ సీనియర్‌ నేత జైరాం రమేశ్‌ సామాజిక మాధ్యమాల వేదికగా కేంద్రంపై ధ్వజమెత్తారు.