Chat GPT: గూగుల్ నే భయపడుతున్న చాట్ జీపీటీ.. ఆ న్యూ టెక్నాలజీ ఏంటి.. సీఈఓ సుందర్ పిచాయ్ ప్లాన్ ఏంటి

Chat GPT: నేటి ప్రపంచంలో చిన్నారుల నుంచి పెద్దల వరకు మొబైల్ ఫోన్ ఉన్న ప్రతి ఒక్కరికీ తెలిసిన పేరు గూగుల్. ప్రపంచంలో ఎక్కడి నుంచి అయిన.. ఏం తెలుసుకోవాలన్నా .. ముందు చేసే పని గూగుల్ చేయడం..

వార్తలు, వీడియోలు, కొత్త విషయాలు, సమాచారం, ఫోటోలు.. ఒక్కటేమిటి మనకి ఏది కావాలన్నా మందుగా గూగుల్ మీదే ఎక్కువ ఆధారపడి ఉన్నాం.

ఇక గూగుల్ కి సంబంధించిన జీమెయిల్‌, గూగుల్‌ ఫొటోస్‌, మ్యాప్స్‌లాంటి వాటిని కూడా రోజు వారి జీవితంలో నిత్యం ఉపయోగిస్తూనే ఉంటాం.

అలాంటిది ఇప్పుడు గూగుల్ కి కూడా గట్టిపోటీ ఎదురైందని చెప్పాలి. ఒకరకంగా చెప్పాలంటే గూగుల్ ఇప్పుడు భయపడుతోందనే చెప్పాలి. దానికి కారణం- చాట్‌ జీపీటీ

సాంకేతిక ప్రపంచంలో వచ్చిన సరికొత్త ఆవిష్కరణ ఈ చాట్ జీపీటీ

చాట్‌జీపీటీ.. కృత్రిమ మేధ (ఆర్టిఫిషియల్‌ ఇంటెలిజెన్స్‌)తో తయారైన చాట్‌బాట్‌ గూగుల్‌ కి సవాల్‌ గా మారింది.

ప్రయోగ దశలోనే రెండు వారాల్లో 10లక్షల మంది యూజర్లను దాటిన ఈ చాట్‌ జీపీటీని చూసి గూగుల్‌ అప్రమత్తం కావాల్సిన పరిస్థితి తలెత్తింది.

రెండేళ్లలో ఇది గూగుల్‌ను దాటి పోతుందని అనుకుంటున్నారు.

అసలు ఏంటీ చాట్‌జీపీటీ..

శాన్‌ఫ్రాన్సిస్కోలోని ఓపెన్‌ఏఐ అనే సంస్థ కృత్రిమ మేధ సాయంతో తయారు చేసిన సాఫ్ట్‌వేరే ఈ చాట్‌జీపీటీ. 2015లో శామ్‌ ఆల్ట్‌మన్‌, ఎలాన్‌ మస్క్‌ కలసి 100 కోట్ల డాలర్లతో ఈ కంపెనీని ఆరంభించారు.

2018లో మస్క్‌ రాజీనామా చేశారు. అయినా పెట్టుబడులు మాత్రం పెడుతున్నారు.

2019లో మైక్రోసాఫ్ట్‌ కూడా ఇందులో 100 కోట్ల డాలర్ల పెట్టుబడి పెట్టింది.

ప్రత్యేకత..

ఇంటర్నెట్‌లోని కోట్ల పదాల శిక్షణతో రూపొందిన ఏఐ లాంగ్వేజ్‌ ప్రాసెసింగ్‌ జీపీటీ-3ని (జెనెరేటివ్‌ ప్రి ట్రైన్డ్‌ ట్రాన్స్‌ఫార్మర్‌-3) ఓపెన్‌ఏఐ ప్రకటించింది.

ప్రస్తుతానికి 175 బిలియన్‌ రకాల పారామితులతో కూడిన అత్యంత భారీ, శక్తిమంతమైన ఏఐ లాంగ్వేజ్‌ ప్రాసెసింగ్‌గా దీన్ని భావిస్తున్నారు.

300 బిలియన్‌ పదాలను దీని వ్యవస్థలో అమర్చారు.

మనుషుల మాదిరిగా రాతరూపంలో ఆవిష్కరించటమేగాకుండా, అనువాదాల్లో కూడా ఇది ఎంతో కచ్చితంగా ఉంటుంది.

గూగుల్‌ సెర్చి మాదిరిగా ప్రశ్నలకు సమాధానాలను లిస్ట్‌ చేయటంతో ఆగకుండా.. సులభంగా అర్థమయ్యేలా సమాధానాలను రాతరూపంలో రాస్తుంది. చాట్‌జీపీటీ.

అంతేగాకుండా ఏవైనా అంశంపై కొత్త వ్యాసం కావాలన్నా, పరిశోధన పత్రాలు కావాలన్నా రాసిస్తుంది.

అంతెందుకు టాపిక్‌ చెబితే కొత్త కవిత, లేఖలు కూడా తక్షణమే రాసిస్తుంది. మనుషులు మాట్లాడే వివిధ భాషలను అర్థం చేసుకొని సమాధానం ఇవ్వగలుగుతుంది.

మనుషులు మాట్లాడుకున్నట్లే పిచ్చాపాటీ కబుర్లు చెబుతుంది. జోక్‌లు పేలుస్తుంది.

వినియోగదారుల ప్రశ్నలకు సమాధానాలిచ్చే చాట్‌బోట్‌లు ఇప్పటికే అందుబాటులో ఉన్నాయి.

కానీ వాటి పరిధి చాలా పరిమితం. ఈ చాట్‌జీపీటీ మాత్రం వేగంగా, ఎదురుగా మనిషి కూర్చొని సమాధానం ఇచ్చినట్లే ఏది అడిగినా చెబుతుంది.

వినియోగం..

ప్రస్తుతానికి ఇదింకా ప్రయోగాత్మక దశలోనే ఉంది. ఉచితంగా అందుబాటులోనే ఉంది.

ఓపెన్‌ఏఐ.కామ్‌ వెబ్‌సైట్‌లోకి వెళ్లి నమోదు చేసుకొని దీన్ని వినియోగించి చూడవచ్చు.

వాడుతున్నవారి నుంచి సూచనలు తీసుకొని తీర్చిదిద్దుతున్నారు.

లోపాలు లేకుండా పూర్తిస్థాయిలో ప్రజలందరికీ అందుబాటులో రావటానికి సమయం పడుతుంది.

గూగుల్‌ భయపడడానికి కారణం..

గూగుల్‌లో ఏదైనా అడిగితే దానికి సంబంధించిన లింక్‌ల జాబితా వరుసగా రావడం చూడవచ్చు.

కానీ అదే చాట్‌జీపీటీని అడిగితే… అరటి పండు ఒలిచి నోట్లో పెట్టినంత వివరంగా అర్థం చేయిస్తుంది.

అందుకే ఇది పూర్తిస్థాయిలో అందుబాటులోకి వస్తే గూగుల్‌ ఇంజిన్‌పై ఆధారపడటం తగ్గుతుందన్నది ఆందోళన.

గూగుల్ ని ఎవరైనా ఉపయోగించవచ్చు. కానీ వారికి కొద్దిపాటి అవగాహన, అక్షరాశ్యత ముఖ్యం అనేది వాస్తవం.

లేకపోతే సంబంధిత విషయం కోసం వేరే వారి సహాయం తీసుకొని వారి ద్వారా గూగుల్ లో తెలుసుకోవాలి.

కానీ ఈ చాట్ జీపీటీని నిరక్షరాస్యులు కూడా సులభంగా వినియోగించవచ్చు.

దీంతో ఎల్లో పేజెస్‌ను గూగుల్‌ ఎలా దెబ్బతీసిందో… చాట్‌జీపీటీ గూగుల్‌కు అదే పని చేయబోతోంది’’అని జీమెయిల్‌ డెవలపర్‌ పౌల్‌ బుచెట్‌ హెచ్చరించటం గమనార్హం.

ఇక మరో ఏడాదో రెండేళ్లలోనో కృత్రిమ మేధ గూగుల్‌ను ఇది పతనం చేయడం ఖాయం అని అంతా భావిస్తున్నారు.

మరోవైపు ఈ ప్రమాదాన్ని పసిగట్టిన గూగుల్‌.. చాట్‌జీపీటీకి దీటైన సాఫ్ట్‌వేర్‌ను రూపొందించే పనిలో పడిందని సమాచారం అందుతుంది.

కేవలం సంభాషణలకే పరిమితం కాకుండా, చాట్‌జీపీటీకి మించి, బొమ్మలతో కూడిన సమాధానాలు ఇచ్చేలా కొత్త సాఫ్ట్‌వేర్‌తో రావాలని తమ ఏఐ టీం కి సీఈవో సుందర్‌పిచాయ్‌ ఆదేశించినట్లు సోషల్ మీడియాలో వార్తలు వస్తున్నాయి.

చూడాలి మరి .. గూగుల్ ఈ పోటీని తట్టుకొని నిలుస్తుందా లేదా అని.

 

https://www.youtube.com/Prime9News
https://www.youtube.com/@Prime9Digital

Facebook:  https://www.facebook.com/prime9news

Twitter: https://twitter.com/prime9news

Instagram: https://www.instagram.com/prime9news/