Suicide Attack : పాకిస్థాన్ లో ఆత్మాహుతి దాడి.. 39 మంది మృతి.. 200 చేరే అవకాశం..?

Suicide Attack : పాకిస్థాన్ లో వరుస బాంబు దాడులతో ప్రజలు ప్రాణాలను గుప్పిట్లో పెట్టుకొని భయం భయ,గా బ్రతుకుతున్నారు. కాగా ఇప్పుడు తాజాగా మరో భయానక ఘటన చోటుచేసుకుంది. ఖైబర్ పంక్తుక్వా ప్రావిన్స్ లోని బజౌర్స్ ఖర్ పట్టణంలో జమియత్ ఉలేమా-ఈ-ఇస్లామ్-ఫజల్ సంస్థకు చెందిన మతపరమైన సమ్మేళనం జరుగుతుండగా, ఓ వ్యక్తి తనను తాను పేల్చివేసుకున్నాడు. ఈ ఆత్మాహుతి దాడిలో 39 మంది మృతి చెందగా.. మృతుల సంఖ్య 200కి చేరే అవకాశం ఉందని సమాచారం అందుతుంది.

సాయంత్రం 4 గంటలకు ఈ పేలుడు సంభవించిందని క్షతగాత్రుల్లో ఒకరు తెలిపారు. ఒక్కసారిగా పెద్ద శబ్దంతో పేలుడు సంభవించిందని, తేరుకుని చూశాక పొగ, దుమ్ము, ధూళి కమ్మేసిందని, తెగిపడిన అవయవాలతో ఆ ప్రదేశమంతా బీభత్సంగా మారిందని ఆదామ్ ఖాన్ అనే బాధితుడు వెల్లడించారు. కాగా పేలుడు ధాటికి తీవ్ర విధ్వంసం నెలకొనగా.. మనుష్యుల శరీరాలు ఛిద్రమై.. ఘటనా స్థలంలో పరిస్థితి హృదయ విదారకంగా ఉంది. ఈ ఘటనపై వెంటనే దర్యాప్తు జరపాలని జమియత్ ఉలేమా సంస్థ చీఫ్ మౌలానా ఫజ్లుర్ రహ్మాన్ ప్రధాని షెహబాజ్ షరీఫ్, సీఎం అజామ్ ఖాన్ లను డిమాండ్ చేశారు.
కాగా ఈ ఆత్మాహుతి దాడికి తమదే బాధ్యత అని ఇప్పటి వరకు ఏ సంస్థ ప్రకటించలేదు.