NIA investigation: గత నెలలో రామనవమి వేడుకల సందర్భంగా హౌరాలోని షిబ్‌పూర్‌లో జరిగిన హింసాకాండపై ఎన్ఐఏ దర్యాప్తునకు కలకత్తా హైకోర్టు గురువారం ఆదేశించింది. రామనవమి ఊరేగింపుల సందర్బంగా పశ్చిమ బెంగాల్ లోని హుగ్లీ మరియు హౌరా జిల్లాల్లో ఘర్షణలు చోటు చేసుకున్న విషయం తెలిసిందే. బెంగాల్ గవర్నర్ డాక్టర్ సివి ఆనంద బోస్ డార్జిలింగ్ నుండి హింసాత్మక ప్రాంతాలను సందర్శించడానికి పరుగెత్తటం కూడా సంఘటనల ద్వారా బయటపడింది.
కార్లు, దుకాణాల దహనం..(NIA investigation)
హౌరాలోని షిబ్‌పూర్ మరియు కాజీపరా ప్రాంతంలో కొన్ని పోలీసు వాహనాలతో సహా అనేక కార్లకు నిప్పంటించగా అనేక దుకాణాలు ధ్వంసమయ్యాయి. ఘర్షణల నేపథ్యంలో రాపిడ్ యాక్షన్ ఫోర్స్ (RAF) సిబ్బంది రూట్ మార్చ్ నిర్వహించారు. హింసాకాండలో 45 మంది అరెస్టు కూడా అయ్యారు. రిష్రా రైల్వే స్టేషన్ సమీపంలోని రైల్వే గేట్‌పై కొందరు వ్యక్తులు పెద్ద ఎత్తున పెట్రోల్ బాంబులు విసరడంతో పరిస్థితి ఉద్రిక్తంగా మారింది.కొందరు రైల్వే ట్రాక్‌ గుండా వెళ్లే రైళ్లపై రాళ్లు రువ్వడంతో పాటు రైల్వే స్టేషన్ సమీపంలోని వాహనాన్ని కూడా తగులబెట్టారు. రైల్వే సేవలు పూర్తిగా నిలిపివేయబడ్డాయి. హౌరా స్టేషన్‌లో వేలాది మంది ప్రయాణికులు చిక్కుకుపోయారు.
హింసాకాండ నేపధ్యంలో 144 సెక్షన్ విధించారు. ఇంటర్నెట్ సేవలు నిలిపివేసారు. రాపిడ్ యాక్షన్ ఫోర్స్ (RAF) సిబ్బంది రూట్ మార్చ్ నిర్వహించారు.చిన్నారులపై రాళ్లు రువ్వడంపై హౌరా పోలీస్ కమిషనర్‌కు అత్యున్నత బాలల హక్కుల సంఘం ఎన్‌సిపిసిఆర్ నోటీసు కూడా జారీ చేసింది. సీఎం మమతా బెనర్జీ నిందితులపై చర్యలు తీసుకోకుండా బుజ్జగింపు రాజకీయాలకు పాల్పడుతున్నారని బీజేపీ నేతలు ఆరోపించారు.