వేణుగోపాల్ ధూత్‌: ఐసిఐసిఐ బ్యాంకు రుణం కేసు.. వీడియోకాన్ గ్రూప్ చైర్మన్ వేణుగోపాల్ ధూత్‌ను అరెస్ట్ చేసిన సీబీఐ

Venugopal Dhoot: ఐసిఐసిఐ బ్యాంకు రుణం కేసులో వీడియోకాన్ గ్రూప్ చైర్మన్ వేణుగోపాల్ ధూత్‌ను సెంట్రల్ బ్యూరో ఆఫ్ ఇన్వెస్టిగేషన్ (సిబిఐ) సోమవారం (డిసెంబర్ 26) అరెస్టు చేసింది. ఐసీఐసీఐ బ్యాంక్‌ మాజీ సీఈవో, మేనేజింగ్‌ డైరెక్టర్‌ చందా కొచ్చర్‌, ఆమె భర్త దీపక్‌ కొచ్చర్‌లను సీబీఐ శుక్రవారం అరెస్టు చేసింది. అనంతరం ఇద్దరినీ డిసెంబర్ 26 వరకు సీబీఐ కస్టడీకి పంపింది.

వేణుగోపాల్ ధూత్ ప్రమోట్ చేసిన వీడియోకాన్ గ్రూప్ కంపెనీలకు బ్యాంకింగ్ రెగ్యులేషన్ యాక్ట్, ఆర్‌బిఐ మార్గదర్శకాలు మరియు బ్యాంక్ క్రెడిట్ పాలసీని ఉల్లంఘించి ఐసిఐసిఐ బ్యాంక్ రూ.3,250 కోట్ల రుణ సదుపాయాలను మంజూరు చేసిందని సీబీఐ ఆరోపించింది.కొచర్ల రిమాండ్ విచారణ సందర్భంగా, స్పెషల్ పబ్లిక్ ప్రాసిక్యూటర్ , వీడియోకాన్ ఇంటర్నేషనల్ ఎలక్ట్రానిక్స్‌కు రూ. 300 కోట్ల క్రెడిట్ సదుపాయాన్ని మంజూరు చేయడం ద్వారా చందా కొచ్చర్ ఐపిసి సెక్షన్ 409 కింద ‘నేరపూరిత విశ్వాస ఉల్లంఘన’కు పాల్పడ్డారని వాదించారు. ఆ తర్వాత వీడియోకాన్ గ్రూప్ మేనేజింగ్ డైరెక్టర్ వేణుగోపాల్ ధూత్ నుంచి వచ్చిన రూ.64 కోట్లను తన భర్త కంపెనీ నూపవర్ రెన్యూవబుల్ లిమిటెడ్‌లో పెట్టుబడిగా పెట్టి తన సొంత అవసరాల కోసం మార్చుకున్నారని ఆరోపించారు.

2019లో నమోదైన ఎఫ్ఐఆర్ లో దీపక్ కొచ్చర్, సుప్రీం ఎనర్జీ, వీడియోకాన్ ఇంటర్నేషనల్ ఎలక్ట్రానిక్స్ లిమిటెడ్ మరియు వీడియోకాన్ ఇండస్ట్రీస్ లిమిటెడ్ నిర్వహిస్తున్న నూపవర్ రెన్యూవబుల్స్ (NRL) కంపెనీలతో పాటు కొచర్ దంపతులను మరియు ధూత్‌ను సీబీఐ నిందితులుగా పేర్కొంది.