IMD : మండుతున్న ఎండలు, ఉక్కపోత వాతావరణం నేపథ్యంలో వాతావరణశాఖ చల్లని కబురు చెప్పింది. భూ ఉపరితలం వేడెక్కడంతో పలు తెలంగాణలోని పలు జిల్లాల్లో వర్షాలు కురిసే అవకాశం ఉందని హైదరాబాద్‌ వాతావరణ కేంద్రం వెల్లడించింది. రేపటి నుంచి ఏప్రిల్ 3వ తేదీ వరకు తేలికపాటి నుంచి మోస్తరు వర్షాలు పడే వీలుందని తెలిపింది. 4వ తేదీన వాన ప్రభావం తక్కువగా ఉండే అవకాశం ఉందని పేర్కొంది.
వర్షాల కారణంగా 2, 3 తేదీల్లో గరిష్ఠ ఉష్ణోగ్రతలు 3-4 డిగ్రీలు తక్కువగా నమోదవుతాయని వాతావరణ కేంద్రం వెల్లడించింది. ఆదిలాబాద్‌, కుమురం భీం ఆసిఫాబాద్‌, నిర్మల్‌, నిజామాబాద్, కామారెడ్డి, మెదక్‌, మహబూబ్‌నగర్‌, వనపర్తి, జోగులాంబ గద్వాల, వికారాబాద్‌ తదితర జిల్లాల్లో వర్షం కురిసే అవకాశం ఉందని తెలిపింది. పలుచోట్ల ఈదురుగాలులు కూడా వీచే వీలుందని పేర్కొంది.