Pakistan-Based Lashkar Terrorist Abdul Rehman Makki Dies Of Heart Attack: ముంబై దాడుల సూత్రధారి హఫీజ్ సయిద్ బామ్మర్ది, నిషేధిత లష్కరే తోయిబా డిప్యూటీ చీఫ్ హఫీజ్ అబ్దుల్ రెహమాన్ మక్కీ శుక్రవారం కన్నుమూశారు. లాహోర్‌లో గుండెపోటుతో మరణించినట్లు తెలుస్తోంది. మధుమేహంతో బాధపడుతుండగా లాహోర్‌లోని ఓ ఆస్పత్రికి తరలించారు. అయితే చికిత్స పొందుతుండగా.. ఒక్కసారిగా గుండెపోటు రావడంతో ఆస్పత్రిలోనే కుప్పకూలినట్లు వైద్యులు వెల్లడించారు.
లష్కరే తోయిబా ప్రకారం.. అబ్దుల్ రెహమాన్ మక్కీ గత కొంతకాలంగా అనారోగ్యంతో బాధపడుతున్నారు. ఈ నేపథ్యంలోనే అధిక మధుమేహం కారణంగా లాహోర్‌లోని ఓ ప్రైవేట్ ఆస్పత్రికి తరలించగా.. తెల్లవారుజామున గుండెపోటు రావడంతో ఆస్పత్రిలోనే తుది శ్వాస విడిచినట్లు అధికారులు వెల్లడించారు.
లష్కర్ తోయిబా హఫీజ్ సయోద్ బామ్మర్ది అయిన అబ్దుల్ రెహమాన్ మక్కీపై టెర్రర్ ఫైనాన్సింగ్ కేసులో ఉగ్రవాద వ్యతిరేక కోర్టు దాదాపు 6 నెలల జైలు శిక్ష విధించింది. ఈ కేసులో శిక్ష పడిన తర్వాత మక్కీ బయటకు ఎక్కువగా కనిపించకుండా ఉండేవాడు. ఇక, 2023లో మక్కీని ఐక్యరాజ్యసమితి గ్లోబల్ టెర్రరిస్ట్‌గా గుర్తించింది. అంతేకాకుండా అతడి ఆస్తులను స్వాధీనం చేసుకోవడం, ప్రయాణాలు, ఆయుధాలకు సంబంధించి నిషేధం విధించింది.