Watermelon Seeds Benefits: సమ్మర్‌లో వివిధ రకాల సీజనల్ ఫ్రూట్స్ లభిస్తాయి. ఆరోగ్యంగా ఉండటానికి మనం వీటిని ప్రతి రోజూ ఆహారంలో భాగంగా చేర్చుకోవచ్చు. వీటిలో పుచ్చకాయ కూడా ఒకటి. పోషకాలలు సమృద్ధిగా ఉండే పుచ్చకాయ శరీరంలో నీటి లోపాన్ని తొలగించడమే కాకుండా అనేక ఆరోగ్య సమస్యలను నివారించడంలో సహాయపడుతుంది. ఇది శారీరకంగా మాత్రమే కాకుండా.. మానసిక ఆరోగ్యానికి కూడా చాలా ప్రయోజనాలను అందిస్తుంది.
పుచ్చకాయతో పాటు.. వాటి యొక్క గింజలు కూడా ఆరోగ్యానికి చాలా మేలు చేస్తాయని మీకు తెలుసా ?. పుచ్చ గింజలు కొన్ని రకాల ఆరోగ్య సమస్యలు రాకుండా చేస్తాయి. ప్రత్యేకత ఏమిటంటే వీటిలో కేలరీలు తక్కువగా ఉంటాయి. అంతే కాకుండా ఇవి యాంటీ ఇన్ఫ్లమేటరీ , యాంటీఆక్సిడెంట్ లక్షణాలను కలిగి ఉంటాయి. పుచ్చకాయ గింజలు తినడం వల్ల కలిగే ప్రయోజనాలు తెలుసుకుందామా..
రోగనిరోధక శక్తి: పుచ్చకాయ గింజల్లో ఖనిజాలు , ఐరన్ పుష్కలంగా ఉంటాయి. ఇవి రోగనిరోధక శక్తిని బలోపేతం చేయడంలో సహాయపడతాయి. అంతే కాకుండా వీటిలో ఉండే మెగ్నీషియం శరీరాన్ని అలెర్జీల నుండి రక్షించడంలో అలాగే రోగనిరోధక శక్తిని మెరుగుపరచడంలో ముఖ్యమైన పాత్ర పోషిస్తుంది.
చర్మానికి మేలు : పుచ్చకాయ గింజలు తినడం వల్ల మొటిమలు, చర్మం పొడిబారడం, వృద్ధాప్య సంకేతాలు తగ్గుతాయి. వీటిలో ఉండే యాంటీఆక్సిడెంట్లు చర్మాన్ని యవ్వనంగా ఉంచడంలో ఉపయోగపడతాయి. అంతే కాకుండా సహజమై మెరుపును పెంచడంలో సహాయపడతాయి.
ఎముకలకు బలం : మీరు మీ ఎముకలను బలోపేతం చేయాలనుకుంటే.. పుచ్చకాయ విత్తనాలు మీకు ప్రయోజనకరంగా ఉంటాయి. వీటిలో ఉండే ఒమేగా-3 కొవ్వు ఆమ్లాలు, ప్రోటీన్, జింక్, ఫోలేట్, పొటాషియం ఎముకలను బలోపేతం చేయడంలో సహాయపడే సహజ మల్టీవిటమిన్‌గా పనిచేస్తాయి.
గుండెకు మేలు: ఈ విత్తనాలలో మెగ్నీషియం పుష్కలంగా ఉంటుంది. అందుకే ఇవి గుండెను ఆరోగ్యంగా ఉంచడంలో సహాయపడతాయి. రక్తపోటును కూడా నియంత్రిస్తాయి. అంతే కాకుండా రక్త ప్రసరణను మెరుగుపరుస్తుంది. వీటిలో ఉండే కొవ్వు ఆమ్లాలు గుండెపోటు , స్ట్రోక్ వంటి హృదయ సంబంధ సమస్యలను నివారించడంలో సహాయపడతాయి.
జుట్టుకు ప్రయోజనకరం: పుచ్చకాయ గింజల్లో ప్రోటీన్ , ఐరన్ పుష్కలంగా ఉంటాయి. ఇవి జుట్టును బలంగా ,ఆరోగ్యంగా ఉంచడంలో సహాయపడతాయి. వీటిలో ఉండే మెగ్నీషియం జుట్టు మూలాలకు పోషణను అందిస్తుంది. అంతే కాకుండా ఇది జుట్టు రాలడం సమస్యను తగ్గిస్తుంది. మీరు జుట్టు రాలడం గురించి ఆందోళన చెందుతుంటే.. పుచ్చకాయ విత్తనాలు మీకు ప్రయోజనకరంగా ఉంటాయి.
జీర్ణక్రియ: పుచ్చకాయ గింజల్లో ఫైబర్ , మెగ్నీషియం పుష్కలంగా ఉంటాయి. ఇవి జీర్ణవ్యవస్థకు మేలు చేస్తాయి. వేసవిలో మీకు జీర్ణ సమస్యలు ఉంటే.. ఈ విత్తనాలను తీసుకోవడం ప్రయోజనకరంగా ఉంటుంది. పుచ్చకాయ గింజలను తీసుకోవడం వల్ల జీర్ణ సమస్యల నుండి ఉపశమనం లభిస్తుంది. వీటిలో ఫైబర్ పుష్కలంగా ఉంటుంది కాబట్టి ఇది మలబద్ధకం, అజీర్ణం , ఆమ్లత్వం వంటి సమస్యల నుండి ఉపశమనం పొందడంలో సహాయపడుతుంది.
డయాబెటిస్‌:మధుమేహ రోగులకు పుచ్చకాయ విత్తనాలు చాలా ప్రయోజనకరంగా ఉంటాయి. వీటిని తినడం వల్ల రక్తంలో చక్కెర స్థాయిలు నియంత్రణలో ఉంటుంది. వీటిలో ఉండే మెగ్నీషియం కార్బోహైడ్రేట్ జీవక్రియను సమతుల్యంగా ఉంచుతుంది. మీరు డయాబెటిస్‌తో బాధపడుతుంటే.. ప్రతిరోజూ పుచ్చకాయ గింజలు తినడం ప్రయోజనకరంగా ఉంటుంది.
బరువు తగ్గడం: మీరు ఊబకాయంతో బాధపడుతుంటే.. పుచ్చ గింజలు తీసుకోవడం ప్రయోజనకరంగా ఉంటుంది. వీటిలో కేలరీలు తక్కువగా ఉంటాయి. కాబట్టి బరువును నియంత్రించడంలో మీకు చాలా బాగా సహాయపడతాయి.