Google Promotions: ప్రపంచ వ్యాప్తంగా నెలకొన్న అనిశ్చిత ఆర్థిక పరిస్థితుల నేపథ్యంలో దిగ్గజ టెక్‌ కంపెనీలు లేఆఫ్‌లను అమలు చేస్తున్నాయి. దీంతో వందలకొద్దీ ఉద్యోగులు ఉపాధి కోల్పోతున్నారు.
ఈ క్రమంలో దిగ్గజం కంపెనీ గూగుల్ కూడా ఇటీవలి కాలంలో అనేక మంది ఉద్యోగులను తొలగించిన సంగతి తెలిసిందే. ఈ క్రమంలోనే ఉద్యోగుల ప్రమోషన్ల విషయంలోనూ గూగుల్ యాజమాన్యం సంచలన నిర్ణయం తీసుకుంది.
గతంలో కంటే ఈ ఏడాది తక్కువ ప్రమోషన్లు ఉంటాయని గూగుల్ .. ఉద్యోగులకు సమాచారం అందించినట్లు తెలుస్తోంది.
తక్కువ సంఖ్యలోనే ప్రమోషన్లు(Google Promotions)
గతంలో మాదిరిగానే ప్రమోషన్ల ప్రక్రియ మేనేజర్ల నేతృత్వంలో ఉండనుంది. అయితే ఈ ఏడాది సంస్థలో నియామాలు పెద్దగా చేపట్టకపోవడంతో ప్రమోషన్లు కూడా తక్కువ సంఖ్యలోనే ఉంటాయని సమాచారం.
అది కూడా ఎల్‌ 6, ఆ పై స్థాయిలోనే ప్రమోషన్లు ఉండనున్నట్లు తెలుస్తోంది. గూగుల్ తీసుకొచ్చిన కొత్త పనితీరు వ్యవస్థ ప్రకారం సీనియర్లు, నాయకత్వ స్థాయిలో తగినంత మంది ఉద్యోగులు ఉండాలి.
అందుకు అనుగుణంగా ఈ ప్రమోషన్లు ఉంటాయని యాజమాన్యం ఉద్యోగులకు పంపిన ఈ-మెయిల్‌లో స్పష్టం చేసినట్లు తెలుస్తోంది.
ఇంటర్నల్ సర్వే తో
ప్రతి కంపెనీలో మధ్య స్థాయిలో పనిచేసే ఉద్యోగులే కీలకం. కానీ, ప్రమోషన్లపై వారిలో ఆందోళనలు నెలకొన్న నేపథ్యంలో యాజమాన్యం ఈ నిర్ణయం తీసుకున్నట్లు తెలిసింది.
ఇందుకోసం కంపెనీ గత ఏడాదే ఒక ఇంటర్నల్ సర్వే కూడా నిర్వహించినట్లు తెలుస్తోంది.
ప్రమోషన్ల కోసం మార్చి 6 నుంచి 8 తేదీల మధ్య స్వయంగా నామినేట్ చేసుకోవచ్చని గూగుల్ ఉద్యోగులకు పంపిన ఈ-మెయిల్ లో పేర్కొంది.
ఆర్థిక సంక్షోభం కారణంగా గూగుల్ భారీగా ఆదాయాన్ని కోల్పోయింది. ఈ క్రమంలో జనవరిలో గ్లోబల్ గా 12 వేల మంది ఉద్యోగులను తొలగిస్తున్నట్లు సీఈవో సుందర్ పిచాయ్ (Google Promotions) ప్రకటించారు.
అయితే తొలగించిన ఉద్యోగులకు స్థానిక చట్టాలకు అనుగుణంగా పరిహారాలను అందిస్తున్నట్లుఆయన వెల్లడించిన సంగతి తెలిసిందే.