Grandmaster Koneru Humpy World Rapid Chess Champion: న్యూయార్క్ వాల్ స్ట్రీట్‌లో జరిగిన ఫిడే వరల్డ్ ర్యాపిడ్ ఛాంపియన్షిప్-2024, బ్లిట్జ్‌ చెస్ ఛాంపియన్షిప్ మహిళల విభాగంలో భారత ప్లేయర్ కోనేరు హంపీ విజేతగా అవతరించి కొత్త చరిత్ర సృష్టించింది. ఈ టోర్నీలో 8.5 పాయింట్లతో తొలిస్థానం కైవశం చేసుకున్న హంపి, 2019లోనూ ఛాంపియన్‌‌గా నిలిచింది. చైనా గ్రాండ్మాస్టర్ జు వెంజున్ తర్వాత ఒకటి కంటే ఎక్కువసార్లు విజేతగా నిలిచిన ప్లేయర్‌గా తాజా విజయంతో హంపి ఘనత సాధించింది.
ఇదిలా ఉండగా, ఈ పోటీల్లో ద్రోణవల్లి హారిక ఐదోస్థానం కైవసం చేసుకుంది. మరోవైపు, పురుషుల ర్యాపిడ్ ఈవెంట్‌లో పదికి గానూ తొమ్మిది రౌండ్ల వరకు తొలిస్థానంలో నిలిచిన భారత గ్రాండ్మాస్టర్ అర్జున్ ఇరిగేశి.. చివరిలో తడబడటంతో, 9 పాయింట్లతో ఐదో స్థానానికి పరిమితం కాగా, రష్యాకు చెందిన 18 ఏళ్ల వోలాదర్ ముర్జిన్‌ విజేతగా నిలిచాడు. కాగా, అసమానమైన పట్టుదల, సంకల్పం, నైపుణ్యం గల హంపి రాబోయే రోజుల్లో మరిన్ని విజయాలు అందుకోవాలని సీఎం చంద్రబాబు అకాంక్షించారు.