ECG Test: ప్రపంచవ్యాప్తంగా గుండె జబ్బులు ఎక్కువగా వ్యాపిస్తుండటంతో.. ప్రజలందరూ జాగ్రత్తగా ఉండాలని ఆరోగ్య నిపుణులు సూచిస్తున్నారు. జీవనశైలి, ఆహారంలో మెరుగుదలతో పాటు.. క్రమం తప్పకుండా ఆరోగ్య పరీక్షలు చేయించుకోవడం ద్వారా మీరు అనేక వ్యాధులను నివారించవచ్చు. ఆరోగ్య పరీక్ష ద్వారా.. శరీరంలో ఏదైనా వ్యాధి పెరుగుతుందో లేదో ముందుగానే తెలుసుకోవచ్చు.
ECG లేదా ఎలక్ట్రో కార్డియోగ్రామ్ పరీక్ష గుండె సమస్యలను గుర్తించడంలో సహాయపడుతుంది. ఇది గుండె యొక్క వివిధ కార్యకలాపాలను కొలవడానికి ఉపయోగించే రోగనిర్ధారణ ప్రక్రియ అని చెప్పొచ్చు. ఈ సంకేతాలు హృదయ స్పందన, లయ గురించి సమాచారాన్ని ఇస్తాయి. దీని సహాయంతో డాక్టర్లు మీ గుండెలో పనితీరు సరిగ్గా ఉందో లేదో కనుగొంటారు.
ECG పరీక్ష ఎందుకు అవసరం ?
మన గుండె కొట్టుకున్నప్పుడు అది కండరాలను సంకోచించమని సూచించే చిన్న విద్యుత్ సంకేతాలను ఉత్పత్తి చేస్తుంది. ECG యంత్రం ఈ సంకేతాలను రికార్డ్ చేసి గ్రాఫ్‌గా ప్రదర్శిస్తుంది. ECG అనేది వైద్యుడి సలహా మేరకు చేసే పరీక్ష.
ఛాతీ నొప్పి లేదా బిగుతు, క్రమరహిత హృదయ స్పందన, శ్వాస ఆడకపోవడం, మూర్ఛ లేదా తలతిరగడం, తీవ్ర అలసట వంటి పరిస్థితులకు కారణాన్ని నిర్ధారించడానికి వైద్యుడు ECG పరీక్ష చేస్తారు.
గుండె జబ్బులను ఎలా గుర్తించాలి ?
అమెరికన్ హార్ట్ అసోసియేషన్ నివేదిక ప్రకారం.. ప్రారంభ దశలో గుండె సమస్యలను గుర్తించడంలో ECG చాలా ఉపయోగకరమైన పరీక్ష. ది లాన్సెట్ (2020) లో ప్రచురితమైన ఒక అధ్యయనంలో.. ECG స్క్రీనింగ్ గుండె జబ్బుల నుండి మరణించే ప్రమాదాన్ని 30% తగ్గించవచ్చని పరిశోధకులు నివేదించారు.
అదేవిధంగా.. యూరోపియన్ సొసైటీ ఆఫ్ కార్డియాలజీ మార్గదర్శకాల ప్రకారం.. హై-రిస్క్ కార్డియాక్ రోగులకు ప్రారంభ స్క్రీనింగ్‌లో ECG తప్పనిసరి.
ఈ విషయాలను గుర్తుంచుకోండి:
ECG అనేది ఒక సాధారణ పరీక్ష.
ECG చేయించుకునే ముందు మీరు సాధారణంగా ఆహారం తినవచ్చు, తాగవచ్చు
ECG చేయించుకునే ముందు మీరు ఎలాంటి మందులు తీసుకుంటున్నారో డాక్టర్ కు తెలియజేయాలి..
శరీరం శుభ్రంగా, పొడిగా ఉండి, నూనెలు, లోషన్లు లేకుండా ఉన్నప్పుడు ECG ఉత్తమంగా పనిచేస్తుంది.