ఢిల్లీ సరిహద్దుల్లో నెలల తరబడి మూడు వ్యవసాయ చట్టాలకు వ్యతిరేకంగా ఆందోళన చేస్తున్న రైతులకు మద్దతుగా మహారాష్ట్రలోని 21 జిల్లాల నుండి పెద్ద సంఖ్యలో రైతులు ముంబయ్ ఆజాద్ మైదాన్ వద్ద భారీ ర్యాలీని నిర్వహించడానికి బయలు దేరారు,మహారాష్ట్రలోని నాసిక్ జిల్లా వద్ద రైతులు గుమిగూడి ముంబైకి దాదాపు 170 కిలోమీటర్ల మార్చ్‌ను శనివారం ప్రారంభించారు. మరికొన్ని గంటల్లో వారు రాష్ట్ర రాజధానికి చేరుకుంటారు.

జెండాలు ఊపుతూ, బ్యానర్లు పట్టుకొని రెండు నగరాల మధ్య కాసర ఘాట్ ప్రాంత రహదారుల గుండా పెద్ద సంఖ్యలో రైతులు కవాతు చేస్తున్నట్లు ఒక వీడియో చూపించింది,అఖిల్ భారతీయ కిసాన్ సభ ఏర్పాటు చేసిన ర్యాలీ జనవరి 25 న ముంబైలో జరుగుతుందని సంస్థ విడుదల చేసిన ఒక ప్రకటనలో తెలిపింది. ఒక ప్రతినిధి బృందం గవర్నర్ భగత్ సింగ్ కోష్యారికి మెమోరాండం కూడా సమర్పించనున్నట్లు ప్రకటనలో తెలిపారు.ఎన్ సిపి చీఫ్ శరద్ పవార్ ర్యాలీలో ప్రసంగించనున్నారు. ర్యాలీలో రాష్ట్ర కాంగ్రెస్ అధ్యక్షుడు బాలాసాహెబ్ తోరత్, శివసేన నాయకుడు ఆదిత్య థాకరే కూడా  పాల్గొంటారని తెలుస్తోంది.

గత ఏడాది సెప్టెంబర్‌లో పార్లమెంటు ఆమోదించిన మూడు  వ్యవసాయ చట్టాలు దేశవ్యాప్తంగా రైతుల నిరసనను ఎదుర్కొంటున్నాయి.ఈ చట్టాలను రద్దు చేయాలని డిమాండ్ చేస్తూ పంజాబ్, హర్యానా మరియు పశ్చిమ ఉత్తర ప్రదేశ్ నుండి వేలాది మంది రైతులు దాదాపు రెండు నెలలుగా ఢిల్లీ సరిహద్దుల్లో నిరసన తెలుపుతున్నారు. అయితేసంస్కరణలు మధ్యవర్తులను తొలగిస్తాయని మరియు రైతులు తమ ఉత్పత్తులను దేశంలో ఎక్కడైనా విక్రయించడానికి అనుమతిస్తాయని కేంద్రం  చెబుతోంది.ప్రతిష్టంభనను అంతం చేయడానికి ప్రభుత్వం మరియు రైతు సంఘాలు పలు రౌండ్ల చర్చలు జరిపాయి కానీ  పరిష్కారాన్ని కనుక్కోలేకపోయాయి.