Ampere Reo 80: గ్రీవ్స్ ఎలక్ట్రిక్ మొబిలిటీ లిమిటెడ్ (GEML) ఎలక్ట్రిక్ ద్విచక్ర వాహన బ్రాండ్ అయిన ఆంపియర్, రియో 80 తక్కువ బడ్జెట్ ఎలక్ట్రిక్ స్కూటర్‌ను విడుదల చేసింది. దీని ఎక్స్-షోరూమ్ ధర రూ.59,900. కాబట్టి స్మార్ట్‌పోన్ ధరకే కొనుగోలు చేయచ్చు. కొత్త మోడల్‌ను ఎంట్రీ-లెవల్ ఎంపికగా ప్రవేశపెట్టారు. దీనికి లైసెన్స్, రిజిస్ట్రేషన్ అవసరం లేదు. దీని గరిష్ట వేగం గంటకు 25 కిమీ కంటే తక్కువ. రియో 80 కలర్ ఎల్‌సీడీ కలర్ డిస్‌ప్లే, LFP బ్యాటరీ టెక్నాలజీ, ఫ్రంట్ డిస్క్ బ్రేక్, కీలెస్ స్టార్ట్ ఫంక్షనాలిటీని పొందుతుంది. ఇది ఒక్కసారి ఛార్జ్ చేస్తే 80 కిలోమీటర్ల రేంజ్ ఇస్తుంది.
ఆటో ఇండస్ట్రీ సమాచారం ప్రకారం.. ఈ నెలలోనే భారతదేశం అంతటా దీని డెలివరీ ప్రారంభమవుతుంది. గ్రీవ్స్ ఎలక్ట్రిక్ మొబిలిటీ ఎగ్జిక్యూటివ్ డైరెక్టర్, సిఈఓ కె విజయ్ కుమార్ మాట్లాడుతూ.. భారతదేశం అంతటా ఎలక్ట్రిక్ మొబిలిటీని మరింత అందుబాటులోకి తీసుకురావాలనే కంపెనీ దార్శనికతకు అనుగుణంగా ఈ ఆవిష్కరణ జరిగిందని అన్నారు. ఇది వైట్, రెడ్, బ్లూ కలర్ ఆప్షన్స్ అల్లాయ్ వీల్స్‌తో వస్తుంది.
పెరుగుతున్న ఇంధన ధరలు,పర్యావరణ ఆందోళనల మధ్య, సాంప్రదాయ ఇంధనంతో నడిచే వాహనాలకు సరసమైన ప్రత్యామ్నాయాల కోసం వినియోగదారులు వెతుకుతున్నందున భారతదేశంలో ఎలక్ట్రిక్ స్కూటర్ మార్కెట్ క్రమంగా పెరుగుతోంది. రియో 80 వంటి తక్కువ బడ్జెట్ ఎలక్ట్రిక్ స్కూటర్లు ముఖ్యంగా మొదటిసారి రైడర్లు, విద్యార్థులు, తక్కువ-దూర పట్టణ ప్రయాణాలకు ప్రజాదరణ పొందాయి.
గ్రీవ్స్ ఎలక్ట్రిక్ మొబిలిటీ ఇటీవలి నెలల్లో గణనీయమైన వృద్ధిని సాధించింది. వాహన్ డేటా ప్రకారం.. మార్చి 2025లో అమ్మకాలు 6,000 కంటే ఎక్కువ ఎలక్ట్రిక్ ద్విచక్ర వాహనాలకు చేరుకున్నాయి. నెలవారీగా 52శాతం వృద్ధిని నమోదు చేశాయి. GEML మాతృ సంస్థ అయిన గ్రీవ్స్ కాటన్ లిమిటెడ్, దాని వ్యాపార పరివర్తన వ్యూహంలో భాగంగా దాని సాంప్రదాయ ఇంజనీరింగ్ మూలాల నుండి ఎలక్ట్రిక్ మొబిలిటీ రంగానికి వైవిధ్యభరితంగా మారుతోంది. 165 సంవత్సరాల చరిత్ర కలిగిన ఈ కంపెనీ సింగిల్ సిలిండర్ డీజిల్ ఇంజిన్ల తయారీ నుండి బహుళ-ఉత్పత్తి మొబిలిటీ సొల్యూషన్స్ ప్రొవైడర్‌గా ఎదిగింది.