Tirupati: తిరుపతి జిల్లా ఏర్పేడు మండలం వికృతమాల గ్రామంలో సన్నీ ఆప్కోటిక్‌ ప్రైవేట్‌ లిమిటెడ్‌ సంస్థను ముఖ్యమంత్రి వైఎస్‌ జగన్‌మోహన్‌రెడ్డి ప్రారంభించారు. మొబైల్‌ ఫోన్‌ కెమెరా లెన్స్‌ను సన్నీ ఆప్కోటెక్‌ తయారు చేస్తోంది. వివిధ రకాల మొబైల్‌ కంపెనీలకు కెమెరాలను ఆ సంస్థ సరఫరా చేయనుంది. రూ.254 కోట్ల పెట్టుబడితో ఏర్పాటు చేయగా, 3వేల మందికి ఉద్యోగ అవకాశం కలగనుంది. ఇనగలూరులో అపాచీ పరిశ్రమకు సీఎం జగన్‌ శంకుస్థాపన చేసారు. 

ఈ సందర్భంగా సీఎం జగన్‌ మాట్లాడుతూ రెండు ప్రాజెక్టులకు శంకుస్థాపన చేశామని, మూడు ప్రాజెక్ట్‌లను ప్రారంభించామని సీఎం వైఎస్‌ జగన్‌ అన్నారు. టీసీఎల్‌ ద్వారా 2వేల మందికి, ఫాక్స్‌ లింగ్‌ ద్వారా 2 వేల మందికి, సన్నీ ఆప్కోటెక్‌ ద్వారా 3 వేల మందికి ఉపాధి అవకాశాలు కలుగుతాయన్నారు. అపాచీ పరిశ్రమ ఏర్పాటుతో 10 వేల మందికి ఉద్యోగాలు అవకాశాలు లభిస్తాయన్నారు. 2023 సెప్టెంబర్‌ కల్లా పరిశ్రమ అందుబాటులోకి వస్తుందన్నారు. పరిశ్రమ ఏర్పాటుతో 80 శాతం మంది స్థానికులకే ఉద్యోగాలు వస్తాయని సీఎం జగన్‌ తెలిపారు. జిల్లాలో ఏర్పాటు చేసిన ప్రాజెక్టుల ద్వారా దాదాపు 20 వేల మందికి ఉపాధి లభించనుందన్నారు. కంపెనీలకు ఎలాంటి ఇబ్బంది వచ్చినా పూర్తి సహకారం అందిస్తామని సీఎం జగన్‌ అన్నారు. అంతకుముందు సీఎం జగన్ తిరుపతి రూరల్ మండలంలో వకుళమాత ఆలయాన్ని ప్రారంభించి తొలి దర్శనం చేసుకున్నారు.