మున్సిపల్ ఎన్నికల ప్రచారంలో భాగంగా ఆదివారం విజయవాడలో చంద్రబాబు భారీ రోడ్ షో నిర్వహించారు. ఈ సందర్భంగా రాష్ట్ర మంత్రులు పెద్దిరెడ్డి రామచంద్రారెడ్డి, కొడాలి నానిపై చంద్రబాబు విరుచుకుపడ్డారు. ముఖ్యంగాచిత్తూరుకు చెందిన పంచాయతీరాజ్ శాఖ మంత్రి పెద్దిరెడ్డి రామచంద్రారెడ్డిపై తీవ్రస్థాయిలో ధ్వజమెత్తారు. కృష్ణా జిల్లా ఇన్‌చార్జి మంత్రిగా కూడా వ్యవహరిస్తున్న పెద్దిరెడ్డి ఉద్దేశించి పనికిమాలిన మంత్రి అంటూ ఫైరయ్యారు. పెద్దిరెడ్డి పెద్ద రౌడీగా ఫీలవుతున్నారని, తాను రౌడీలకే రౌడీనని వ్యాఖ్యానించారు.

రాష్ట్ర పంచాయతీ రాజ్ శాఖ మంత్రి ఈ జిల్లాకు ఇన్‌చార్జ్ కూడా పెద్ద రౌడీ అనుకుంటున్నాడు. రౌడీలకు రౌడీని నేను నీ గుండెల్లో నిద్రపోతా,ప్రజలు తిరగబడితే నీ రౌడీలు పారిపోవడం, బట్టలిప్పించడం ఖాయం.జాగ్రత్త. సిగ్గు, ఎగ్గు, మానం ఏమీ లేవు. అన్నిటినీ వదిలేశారు. దౌర్జన్యాలు చేసి గెలవాలనుకుంటున్నారు. అసలు ప్రతిపక్షం లేకపోతే అడిగేవాడు లేకపోతే ఎలా? అంటూ చంద్రబాబు ఘాటు వ్యాఖ్యలు చేశారు.

అలాగే రాష్ట్ర పౌరసరఫరాల శాఖ మంత్రి కొడాలి నానిపై సైతం చంద్రబాబు తనదైన శైలిలో విమర్శలు చేశారు. ఒకడు బూతుల మంత్రి నోరు పారేసుకుంటాడు. పేకాట ఆడిస్తాడు. ఆడితే తప్పేముంది అంటాడు. ఎంత సింపుల్ సమాధానం. తాడేపల్లిలో సీఎం దగ్గరకు వెళ్లి దర్జాగా బయటకు వస్తాడు. అంటే సీఎం ఆశీస్సులు తీసుకున్నట్టా? అంటూ కొడాలిని ఉద్దేశించి వ్యాఖ్యానించారు. మేయర్ పదవిని ఎట్టిపరిస్థితుల్లోనూ తెలుగు దేశం పార్టీ సాధించాలని, లేదంటే విజయవాడ జనం తలెత్తుకుని తిరగలేరన్నారని చంద్రబాబు వ్యాఖ్యానించారు. నేరస్థుల అడ్డాగా ఆంధ్రాను తయారు చేస్తున్నారని తీవ్ర వ్యాఖ్యలు చేశారు